Tur cümə günü autsayderlərin dueli ilə start götürdü.

"Football-plus.az" xəbər verir ki, debütant “Darmştadt”ı səfərdə minimal hesabla yenən “Köln” sonuncu pillədən qurtulmağı bacardı. “Keçilər” bundesliqada həm konkret bu rəqibə, həm də debütantlara qarşı məğlubiyyətsiz seriyanı 9 oyuna yüksəltdilər.

Münhendə cümə günü axşamdan başlayan güclü qar şənbə günü şəhərdə nəqliyyatla bağlı ciddi problemlərin yaranmasına səbəb oldu. Bu üzdən “Bavariya” – “Union” oyunu təxirə salındı. Maraqlıdı ki, buna baxmayaraq, “Union” sosial şəbəkədə oyundan xəyali reportaj aparmaq qərarına gəldi. Sadəcə, hər iki komandanın üzvləri meydanda yox, qartopu oynamaqla məşğul idilər.

Şənbə günü keçirilən 4 qarşılaşmanın hamısında meydan sahibləri sevindi. Münhenqladbax “Borussiya”sı “Hoffenhaym”ın səfərdəki məğlubiyyətsiz seriyasına son qoydu. Debütant “Haydenhaym” çətin “Leyptsiq” səfərində çox yaxşı təsir bağışlasa da, xal qazana bilmədi. “Öküzlər” bu qələbə ilə 4-cü pilləyə yüksəldilər. Bu tura qədər cəmi 1 qələbəsi olan “Bohum”un “Volfsburq”u asanlıqla yenməsi gözlənilməz oldu. Halbuki “canavarlar” ötən mövsüm hər iki matçda bu rəqibi darmadağın etmişdilər (evdə 4:0, səfərdə 5:1). Son 7 turda cəmi 1 qələbəsi olan “Volfsburq”da baş məşqçi Niko Kovaçın “kreslosu” yavaş-yavaş laxlamağa başlayır. Günün əsas oyununda “Ştutqart” “Verder”ə heç bir şans verməyərək hesabına növbəti 3 xalı yazdı. Dəniz Undav son 5 turda 5-ci qolunu vuraraq əla performansını davam etdirdi. Türkəsilli olmasına rəğmən, Türkiyə yığmasında oynamağa can atmayan 27 yaşlı forvardın Almaniya yığmasına dəvət edilməsi gündəmdədi. Komanda sonuncu dəfə çempion olduğu 2006/07-də 13 tura 24 xal toplamışdısa, hazırda şvabiyalıların hesabında 30 xal var! Amma Sebastyan Hönessin kollektivinin iddiasına və əsl gücünə qarşıdakı iki turda aydınlıq gələcək. Çünki “Ştutqart”ı əvvəlcə evdə lider “Bayer-04”, sonra da səfərdə “Bavariya” ilə çətin oyunlar gözləyir.

Bazar günü keçirilən oyunlara gəlincə, evdə “Frayburq”a boyun əyən “Maynts-05” Yan Zivertin başçılığı altında 5-ci matçda ilk dəfə uduzdusa, “Ayntraxt” “Auqsburq” səfərindən əliboş qayıtdı. İlk 11 turda cəmi 1 dəfə uduzan frankfurtluların ardıcıl 2-ci həftəni xalsız tamamlaması diqqəti çəkdi. Bu tur əsas diqqətlər Leverkuzenə yönəlmişdi. Sentyabrın sonlarından bəri keçirdiyi bütün rəsmi oyunlarda qələbə qazanan “Bayer-04”ü, nəhayət, dayandıran tapıldı. “Bayarena”da erkən qol vuran Dortmund “Borussiya”sı uzun müddət öndə olsa da, qələbə hesabını qoruya bilmədi. Bununla da “Bayer-04”ün bundesliqada 8, rəsmi matçlarda 14 oyunluq qələbə seriyası başa çatdı. Eyni zamanda Xabi Alonsonun kollektivi bu mövsüm bundesliqada ilk dəfə bir oyunda 2-dən az qol vurdu.

13-cü tur
Bayer-04 – Borussiya D 1:1
Bonifas, 79 – Ryuyerson, 5. (30210)
Bayer-04: Qradetski, Kossunu, Ta, Tapsoba, Frimponq, Palasios (Şik, 79), Caka, Qrimaldo, Hofmann (Adli, 64), Virts, Bonifas.
Borussiya: Kobel, Volf, Hummels, Şlotterbek (Papadopulos, 64), Ryuyerson, Zabitser, Əmrə Can, Bayno-Gittens (Adeyemi, 64), Roys (Menye, 84), Brandt, Füllkruq.

Leyptsiq – Haydenhaym 2:1
Openda, 29-p. Poulsen, 44 – Qimber, 45+2. (40000)
Leyptsiq: Blasvix, Henrixs, Simakan, Klostermann, Raum (Lents, 90+2), Simons (Forsberq, 78), Şlager, Aydara, Baumqartner (Lukeba, 89), Openda, Poulsen (Şeşko, 77).

Maynts-05 – Frayburq 0:1
Qreqoritş, 69. (30000)
Frayburq: Atubolu, Sildilliya, Ginter (Qulde, 24), Linhart, Makenqo, Vaysshaupt (Höler, 59), Eqqeştayn, Höfler, Doan (Şallai, 84), Röl, Qreqoritş (Adamu, 83).

Auqsburq – Ayntraxt F 2:1
Yensen, 34. Yaqo, 58 – Damen, 78-öz qapısına. (25000)
Ayntraxt: Trapp, Tuta, Kox, Paço, Maks, Aaronson (Çaibi, 46), Larsson (Nqankam, 81), Dina Ebimbe (Yakiç, 81), Buta (Nkunku, 46), Knauff (Götse, 64), Marmuş.

Ştutqart – Verder 2:0
Dəniz Undav, 17. Girassi, 75-p. (54500)
Ştutqart: Nübel, Ştentsel (Ruo, 89), Anton, Zaqadu, Mittelştadt (Vaqnoman, 71), Karazor, Miyo, Katompa Mvumpa (Levelinq, 79), Fürix (Çon Vu Yon, 79), Girassi, Dəniz Undav (Ştiller, 71).

Borussiya M – Hoffenhaym 2:1
Plea, 58-p. Nqumu, 80 – Veqhorst, 60. (50000)

Bohum – Volfsburq 3:1
Osterhaqe, 19. Bernardo, 39. Antvi-Acei, 87 – Svanberq, 45+1. (24000)

Darmştadt – Köln 0:1
Zelke, 60. (17810)
“Bavariya” – “Union” oyunu hava şəraiti üzündən təxirə salınıb.
1. Bayer-04 13 11 2 0 38-11 35
2. Bavariya 12 10 2 0 43-9 32
3. Ştutqart 13 10 0 3 33-15 30
4. Leyptsiq 13 8 2 3 31-13 26
5. Borussiya D 13 7 4 2 26-20 25
6. Hoffenhaym 13 6 2 5 25-23 20
7. Ayntraxt F 13 4 6 3 19-15 18
8. Frayburq 13 5 3 5 16-23 18
9. Auqsburq 13 4 5 4 23-25 17
10. Borussiya M 13 4 4 5 27-28 16
11. Volfsburq 13 5 1 7 18-24 16
12. Bohum 13 2 7 4 14-26 13
13. Verder 13 3 2 8 18-27 11
14. Haydenhaym 13 3 2 8 18-28 11
15. Köln 13 2 3 8 10-24 9
16. Darmştadt 13 2 3 8 15-34 9
17. Maynts-05 13 1 5 7 12-26 8
18. Union 12 2 1 9 12-27 7
Bombardirlər: Keyn (Bavariya) – 18, Girassi (Ştutqart) – 16, Openda (Leyptsiq) - 10, Vind (Volfsburq) – 9.
Növbəti turun oyunları dekabrın 8-10-u aralığında keçiriləcək: Borussiya D – Leyptsiq, Union – Borussiya M, Ayntraxt F – Bavariya, Volfsburq – Frayburq, Köln – Maynts-05, Hoffenhaym – Bohum, Verder – Auqsburq, Ştutqart – Bayer-04, Haydenhaym – Darmştadt.

Turun rəqəmi
6 – “Ştutqart”ın hücumunda bu mövsüm gözəl tandem yaranıb. Girassinin 16, Dəniz Undavın 8 qolu var. Elə son turda da şvabiyalılar məhz bu futbolçuların qolları ilə qələbə qazandı. İkinci hissədə penaltidən fərqlənməklə yekun nəticəni müəyyənləşdirən Girassi bundesliqada meydana çıxdığı ardıcıl 6-cı ev oyununda qol vurdu. “Ştutqart”ın heyətində belə seriya yaxalayan son futbolçu 2007/08-də Mario Qomes (7) olmuşdu. Girassinin qolu sayəsində həm də komandanın bu mövsüm bundesliqada hər ev oyununda ən azı 2 qol vurmaq seriyası davam etdi.

Turun ulduzu
Viktor Bonifas (Bayer-04) – heç bir futbolçunun birdən artıq qol vurmadığı turda ulduzu seçmək çətin olsa da, biz üstünlüyü gənc nigeriyalı forvarda veririk. Son 5 turda qola həsrət qalan Bonifas vacib məqamda səhnəyə çıxaraq komandasını məğlubiyyətdən xilas etdi. Bundesliqada ilk mövsümünü keçirən forvard üçün 13 tura 8 qol heç də pis göstərici deyil. Qeyd edək ki, “Bayer-04” “böyük beşlik”də bu mövsüm rəsmi oyunlarda uduzmayan yeganə komandadı (20 oyun, 18 qələbə, 2 heç-heçə).

Turun sitatı
Yan-Kristian Drizen, “Bavariya”nın icraçı direktou: “Çox təəssüf ki, bu turdakı oyunumuzu təxirə salmalı olduq. Fanatların təhlükəsizliyi bizim üçün hər şeydən öndə gəlir. Güclü qar üzündən yollar bağlanmışdı və ictimai nəqliyyat işləmirdi. Fanatların “Alyans Arena”ya gəlişində ciddi problem yaranmışdı. Oyunun yeni tarixi ilə bağlı ən qısa müddətdə məlumat veriləcək”.