Tur cümə günü Dortmund “Borussiya”sının sürpriz xal itkisi ilə start götürdü.

"Football-plus.az" xəbər verir ki, səfərdə “Haydenhaym”ın müqavimətini qıra bilməyən Edin Terziçin komandasının 3 turluq qələbə və 9 turluq qol seriyası qırıldı. Bununla da bundesliqada 2024-cü ildə xal itirməyən komanda qalmadı. “Haydenhaym”ın məğlubiyyətsiz seriyası 7 oyuna çatdı. Debütant statusunda olan bir kollektiv üçün heç də pis göstərici deyil.

Şənbə günü əsas diqqətlər liderlərin oyununa yönəlmişdi. Turnir cədvəlinin 1-ci və sonuncu pillələrində qərarlaşan komandaların duelində sürpriz qeydə alınmadı. “Bayer-04” səfərdə “Darmştadt”ın qapısına hər hissədə bir qol vurmaqla bundesliqada 20-ci turu, bu mövsüm isə 29-cu rəsmi oyunu məğlubiyyətsiz tamamladı. Bu, klub tarixində bir mövsümün gedişində qeydə alınan yeni rekorddu. Leverkuzen təmsilçisi daha öncə 1978/79-da 2-ci bundesliqada oynayarkən ardıcıl 28 rəsmi matçda uduzmamışdı. Ən heyrət doğuran fakt odu ki, “Bayer-04” xalını 52-yə çatdırmaqla indidən, yəni 20 tura ötən mövsümdəki göstəricisini geridə qoyub! Komanda 2022/23-ü 50 xalla başa vurmuşdu. “Bavariya” üçün tarixən bundesliqada ən çətin rəqib sayılan Münhenqladbax “Borussiya”sı “Alyans Arena”da hesabı açan tərəf olsa da, sürprizə gücü çatmadı. Maraqlıdı ki, “Bavariya” 2018/19-dan bəri ilk dəfə bu rəqibi mövsümün hər iki oyununda yenməyi bacardı. Qələbə topunun müəllifi olan Keyn hesabına 24-cü qolu yazdı. İndi turnirin tarixində debüt mövsümündə ən çox qol vuranların siyahısında Keyn yalnız Uve Zeelerdən geri qalır. Əfsanəvi Zeeler 1963/64-də “Hamburq”un heyətində 30 qol vurmuşdu. Onu da bildirək ki, Tomas Müller “Bavariya”da 690-cı rəsmi oyunda 500-cü qələbəyə sevindi. O, 1965-dən, yəni münhenlilər ilk dəfə bundesliqada oynamağa başlayandan bəri klub tarixində 500 qələbə həddinə çatan ilk futbolçu oldu! Bütün Almaniya növbəti tur keçiriləcək liderlərin duelini böyük səbirsizliklkə gözləyir.

“Verder” son həftələrdə rəqib tanımır. “Musiqiçilər” “Bavariya” və “Frayburq”un ardından bu dəfə “Maynts-05”i üstələdilər. Bu da o deməkdi ki, ikinci dövrədə, yəni 18-ci turdan bəri “Verder” xal itirməyən yeganə komandadı. “Leyptsiq” 3 oyunluq məğlubiyyət seriyasına “Union”la ev matçında son qoydu. Openda hesabına 14-cü qolu yazmaqla turnirin tarixində belçikalı futbolçular üçün yeni rekord müəyyənləşdirdi. Buna qədər belçikalılar arasında bundesliqada bir mövsümə ən çox qol vuran futbolçu 2000/01-də “Şalke-04”ün heyətində 13 dəfə fərqlənmiş Emil Mpenza idi. Bərbad mövsüm keçirən “Union” səfərdə ardıcıl 6-cı bundesliqa matçını qolsuz başa vurdu! “Frayburq” və “Ayntraxt” kimi avrokubok iştirakçıları üçün tur uğursuz alındı. “Ştutqart” Frayburqda inamlı qələbə qazanmaqla 3-cü pillədə təsadüfən qərarlaşmadığını göstərdi. Düzdü, meydan sahiblərinin 18-ci dəqiqədən etibarən azlıqda oynadığını da bildirək. Son 4 turda 3 qələbə qazanan “Ayntraxt” isə gözlənilmədən Kölndə qola və xala həsrət qaldı. “Keçilər” 6 oyunluq qələbəsiz seriyaya son qoydular.

20-ci tur
Bavariya - Borussiya M 3:1
Pavloviç, 45. Keyn, 71. De Liqt, 86 – Elvedi, 35. (75000)
Bavariya: Noyer, Mazraui (Boe, 62), Dayer, De Liqt, Devis (Gerreyro, 85), Pavloviç, Qoretska, Müller (Tel, 71), Musiala, Sane, Keyn.

Haydenhaym – Borussiya D 0:0
(15000)
Borussiya: A.Mayer, Menye (Volf, 59), Zyule, Şlotterbek, Maatsen, Zabitser, Salih Özcan (Əmrə Can, 59), Malen, Bayno-Gittens (Polmann, 59), Mukoko (Bensebayni, 75), Füllkruq.

Darmştadt – Bayer-04 0:2
Tella, 33; 52. (17810)
Bayer-04: Qradetski, Tella, Stanişiç, Ta, İnkapye, Qrimaldo, Andrix, Caka (Tapsoba, 88), Virts (Hofmann, 90+2), Hlojek (Mbamba, 90+2), İqlesias.

Leyptsiq – Union 2:0
Openda, 11. Şeşko, 48. (44032)
Leyptsiq: Blasvix, Henrixs, Orban (Lukeba, 70), Klostermann, Raum, Simons, Şlager, Kampl, Olmo (Elmas, 77), Şeşko, Openda (Poulsen, 77).

Frayburq – Ştutqart 1:3
Kübler, 45+11 – Dəniz Undav, 3. Fürix, 7. Mittelştadt, 74. (34700)
Frayburq: Atubolu, Kübler, Qulde, Ginter (Vaysshaupt, 84), Makenqo (Günter, 73), Eqqeştayn, Höfler (Qreqoritş, 73), Şallai, Röl, Qrifo (Musliya, 83), Höler (Filipp, 83).

Köln – Ayntraxt F 2:0
Alidu, 67. Tilmann, 80. (50000)
Ayntraxt: Trapp, Dina Ebimbe (Çaibi, 46), Tuta, Kox, Smolçiç, Nkunku, Skiri, Götse (Rode, 77), Larsson (Maks, 69), Knauff (Bahoya, 77), Kalaydziç (Ekitike, 77).

Maynts-05 – Verder 0:1
Dukş, 2. (31800)

Volfsburq – Hoffenhaym 2:2
L.Mayer, 58: 70-p. – Bayer, 6. Prömel, 66. (20000)

Bohum – Auqsburq 1:1
Broşinski, 33 – Demiroviç, 90+1. (24500)

1. Bayer-04 20 16 4 0 52-14 52
2. Bavariya 20 16 2 2 59-19 50
3. Ştutqart 20 13 1 6 46-26 40
4. Borussiya D 20 10 7 3 40-26 37
5. Leyptsiq 20 11 3 6 44-26 36
6. Ayntraxt F 20 8 7 5 30-24 31
7. Frayburq 20 8 4 8 26-34 28
8. Hoffenhaym 20 7 5 8 37-39 26
9. Verder 20 7 5 8 29-32 26
10. Haydenhaym 20 6 6 8 28-35 24
11. Volfsburq 20 6 5 9 25-32 23
12. Auqsburq 20 5 7 8 29-37 22
13. Borussiya M 20 5 6 9 36-41 21
14. Bohum 20 4 9 7 22-38 21
15. Union 19 5 2 12 18-34 17
16. Köln 20 3 6 11 14-34 15
17. Maynts-05 19 1 8 10 14-31 11
18. Darmştadt 20 2 5 13 22-49 11
Bombardirlər: Keyn (Bavariya) – 24, Girassi (Ştutqart) – 17, Openda (Leyptsiq) – 14, Dəniz Undav (Ştutqart) – 13.
Növbəti turun oyunları fevralın 9-11-i aralığında keçiriləcək: Bayer-04 – Bavariya, Auqsburq – Leyptsiq, Borussiya D – Frayburq, Union – Volfsburq, Ştutqart – Maynts-05, Hoffenhaym – Köln, Ayntraxt F – Bohum, Verder – Haydenhaym, Borussiya M – Darmştadt.

Turun rəqəmi
146 – debütant “Haydenhaym”la səfər oyununda qol vura bilməyən və öz qapısını da toxunulmaz saxlayan Dortmund “Borussiya”sının unikal bir seriyası qırıldı. Belə ki, bundesliqada nə az, nə çox – düz 146 oyundan sonra ilk dəfə “arılar”ın matçında qolsuz bərabərlik qeydə alındı! Bu, aşkar fərqlə turnirin yeni rekordudu. Maraq üçün bildirək ki, bu turnirdə sonuncu dəfə “Borussiya”nın iştirakı ilə keçirilən matçın qolsuz başa çatmasına 2019-cu il oktyabrın 26-da təsadüf olunmuşdu. O, vaxt “Şalke-04”ə qarşı səfər derbisində qapılara qol vurulmamışdı.

Turun ulduzu
Dəniz Undav (Ştutqart) – qürbətçi forvard ilin əvvəlində keçirdiyi ardıcıl 2 uğursuz oyundan sonra yenidən qolları sıralamağa başlayıb. Ötən tur iddialı “Leyptsiq”lə oyunda het-trik edən Dəniz bu dəfə daha bir avrokubok iştirakçısı “Frayburq”la səfər oyununda 1 qol, 2 məhsuldar ötürməlik performans sərgilədi. O, bundesliqada bu mövsüm keçirdiyi 17 qarşılaşmada hesabına 13 qol, 4 məhsuldar ötürmə yazıb. 2022-də “Qalatasaray”ın, ötən il isə Türkiyə yığmasının təklifini geri çevirərək Almaniya yığmasında oynamaq istədiyini açıqlayan kürdəsilli fovardla bağlı bir maraqlı fakt var. Onun Almaniya vətəndaşlığının olduğunu nəzər alsaq, bundesliqada ilk 17 oyunda Dənizdən daha çox qol vuran sonuncu almaniyalı futbolçu 1975/76-da Horst Hrubeş olub (14 qol)!

Turun sitatı
Edin Terziç, Dortmund “Borussiya”sının baş məşqçisi: “0:0-dan artığına layiq deyildik. Topa çox nəzarət etsək də, rəqibin cərimə meydançasına, demək olar, daxil ola bilmirdik. Hücumları məntiqi sonluğa çatdırmaqda çətinlik çəkirdik. Həm passiv idik, həm də sürətimiz aşağı idi. “Borussiya” daha yaxşı oynamalı və daha çox qol vəziyyəti yaratmalıdı. İkinci hissədə oyunumuzu bir qədər yaxşılaşdırsaq da, bu futbol qələbə üçün kifayət etmədi”.