“Qarabağ”ın “Braqa”nı mübarizədən kənarlaşdırmaq üçün çox güc sərf etdiyini bilirdik. Qurban Qurbanovun 120 dəqiqəlik matçdan sonra heyətdə müəyyən rotasiyalar edəcəyinə şübhə yox idi. Əlbəttə, bu məqam “Sumqayıt”a “köhlən atlar”a qarşı cansıxıcı statistikanı yaxşılaşdırmaq və 2-ci pillədəki yerini möhkəmlətmək baxımından yararlı ola bilərdi.

İlk yarı qonaqlar üçün bu mənada ümidverici idi. Lakin “Qarabağ”ın mübarizədən qopmaması və irəliləyən dəqiqələrdə hücumların kəsərini artırması həlledici epizodların xeyrinə işləməsiylə nəticələndi. Əslində “Sumqayıt” rəqibə nisbətən yaxşı başlamışdı. Qonaqlar meydan sahiblərini sıxışdırmaq üzrə idi. Amma Patrik “kimyaçılar” üçün təhlükəli zonada cəsarətli oynayıb topu Abu Dossodan aldı və Nərimana ötürdü. Sonuncu dərhal qapını nişan alsa da, zərbəsi tirin üzərindən keçdi. Ardından Elvin baxımlı reydlə “Sumqayıt” futbolçularını qabaqladı. Onun müəllifi olduğu təhlükəli epizod da qolla bitmədi. Çünki top dirəyin yaxınlığından keçdi. Bundan sonra tərəflərin mərkəzdəki mübarizəsini izlədik. Bir neçə dəqiqəlik süstlükdən sonra Patrik çox ciddi səhvə yol verdi. O, Lukanın ötürdüyü topla irəli getmək əvəzinə yenidən qolkiperə ötürmə verdi. İş ondadı ki, top qapıçıya yox, “çərçivə”yə doğru sürətləndi. Meydan sahiblərinin bəxti gətirdi ki, Patrikin zərbəsi yumşaq alınmışdı və Luka özünü çatdırıb topu meydandan çıxardı. Birinci hissənin sonuncu təhlükəli epizodu “Qarabağ”ın ifasında baş tutdu. Aleksey Nərimanın ötürməsini Patrikə çatdırdı. Lakin onun zərbəsi qapıdan xeyli aralı keçdi.

Bəs 2-ci hissə necə keçdi? “Qarabağ” fürsət gözləyirdisə, “Sumqayıt” qol vurmaq üçün vurnuxurdu. Qonaqlar uzun ötürmələrlə rəqibin qapısına aparan yolu tez qət etmək niyyətinə düşmüşdü. Elə bu cəhdlərin birində Almeyda topu Ninqadan alıb hücuma keçdi. O, “köhlən atlar”ın cərimə meydançasına çatandan sonra Diakabiyə ötürmə etdi. Fransalı yarımmüdafiəçi isə topu rahatlıqla qəbul edib tora qovuşdurdu. Zərbə qapının küncünə nişanlandığından Mehdi özünü yetirə bilmədi. Bir neçə dəqiqə sonra Murad Sorqanın yaxşı ötürməsini zərbəylə tamamlasa da, top qapının üstündən keçdi. Ardından Murata “Qarabağ”ın qapısı yaxınlığında yaxşı şansı boşa verməsi azmış kimi, topu itirdi. Elvin növbəti reydini edib mərkəzi ötdü. Burda Diakabiyə, o isə Benzyaya ötürmə etsə də, sonuncunun zərbəsi dirəyin yanından keçdi. Fransalı yarımmüdafiəçi bununla ruhdan düşmədi. Lazım olan anda uyğun mövqedə olması ona komandasının ikinci qolunun müəllifi olmağı nəsib etdi. Andrade Benzyanın ötürdüyü topla birgə “kimyaçılar”ın cərimə meydançasına daxil oldu və “borcunu qaytardı”. Belədə fransalı dəqiq zərbəylə oyunda son nöqtəini qoydu. “Qarabağ” “Sumqayıt”ın 7 oyunluq məğlubiyyətsizlik seriyasını qırdı, özü isə 12 turdu uduzmur. “Sumqayıt”ın həmin uğurlu seriyası məhz dekabrın 8-də “Qarabağ”dan aldığı acınacaqlı məğlubiyyətdən (1:6) sonra başlamışdı.

Gözdən qaçmadı
* “İmarət Tayfa” həm dəstək, həm də say baxımından “Qarabağ ordu” fanklubundan geri qalırdı.
* “Kimyaçılar” azarkeş qrupu passiv təsir bağışladı.
* Bəhlul və Romao azyaşlı “Qarabağ” azarkeşlərinin forma istəyini qarşılıqsız qoymadı.

KƏNAN BAHADIR