Oyun Azərbaycan futbolu üçün əlamətdar idi.

“Qarabağ” daha əvvəl bir neçə dəfə Avropa Liqasının pley-offuna çıxmağa yaxın olsa da, arzular reallaşmamışdı. Bu dəfə isə vəziyyət fərqli idi. Rəqibin başqalarına nisbətən zəif olması “köhlən atlar”ın şansını xeyli artırmışdı. Üstəlik, “Qarabağ” ev sahibi olduğundan azarkeş dəstəyindən maksimum faydalanmaq iqtidarındaydı.

Matç məhz tərəfdarların gur dəstəyi altında start götürdü. Dərhal bütün gücüylə irəli atılan təmsilçimiz ilk cəhddə hesabı açdı. Daha dəqiq desək, Leandro Andrade rəqib qapıçının komanda yoldaşlarına ötürmək istədiyi topu yiyələndi və 44-cü saniyədə hiyləgər zərbə ilə “çərçivə”ni dəqiq nişan aldı. Bu, “Qarabağ”ın avrokuboklardakı ən erkən qolu idi. Bundan sonra “Həkken” hücum cəhdlərində pay sahibi olmağa çalışdı. Amma həm “Qarabağ”ın, həm də azarkeşlərin güclü təzyiqi qonaqların ayağını əsdirir, səhv zərbələr endirməyə məcbur edirdi. Yəni Amanenin ardıcıl cəhdləri boşa çıxırdı. Onun birinci zərbəsi qapıdan xeyli aralı keçsə də, ikincidə təhlükə yaratmağı bacardı. Nəticədə top dirəyin yanından keçdi.

“Köhlən atlar”ın bu tipli epizodunu isə 29-cu dəqiqədə izlədik. Fərqi artırmağa çox yaxın olsaq da, Andrade Zubirin ötürməsinə çata bilmədi. Hətta rəqib Leandronu cərimə meydançasında yerə yıxdı. Burda hakim bir neçə saniyə VAR-ı dinləsə də, penalti təyin etmədi! Növbəti maraqlı epizodda Çifulya Amanenin ötürməsini qola çevirə bilmədi. Zamanla ağdamlıların təzyiqi artırdığının şahidi olduq. Qurban Qurbanovun yetirmələri “Həkken”ə şans vermir, öz qapısına sıxışdırmağa çalışırdı. Belə epizodların birində “Qarabağ” ikinci dəfə fərqləndi. Romaonun ötürməsi rəqibə toxunduqdan sonra Benzyanın önünə düşdü. Təcrübəli futbolçu usta zərbə ilə topu uzaq “doqquzluğ”a sancdı. Beləliklə, bizimkilər ilk yarının birinci və sonuncu dəqiqələrində vurulan qollarla fasiləyə öndə yollandı.

İkinci yarı da eyni templə başladı. Fərqli olan “Həkken”in daha istəkli çıxış etməsiydi. Nəticədə ilk təhlükəli hücumun müəllifi qonaqlar oldu. Onlar sürətli ötürmələrlə qapı önünə çatdı. Amma Çifulyanın fərlqənmək istəyi yenə baş tutmadı. O, komandasının “çərçivə”yə düşən ilk zərbəsinin müəllifi olsa da, Lunyov qoluyla topu çıxardı. Ardından Benzya Zubirin möhtəşəm ötürməsini puç etdi. Halbuki, o, vaxtında önə atılıb yüzfaizlik qol imkanından yararlana bilərdi. 56-cı dəqiqədə “Qarabağ”ın azlıqda qaldığını gördük. Marko Veşoviç istəmədən də olsa, Tomasa qarşı kobud oynadığına görə meydandan qovuldu.

Başverənlər “köhlən atlar”ı ruhdan sala bilərdi ki, əksi baş verdi. Növbəti hücum cəhdlərinin müəllifi də bizimkilər oldu. Amma Silva Zubirin ötürməsindən sonra rəqib qolkiperi məğlub edə bilmədi. İsveçlilər 70-ci dəqiqədən sonra “yuxudan ayıldı” desək, yanılmarıq. Onlar meydan sahiblərinin daha çox güc sərf edib yorulmasından və boşluqlar verməsindən faydalanmaq istəyirdi. Lakin ağdamlılar hücumda olduğu qədər müdafiədə də yetirincə ciddi və məsuliyyətli oynadı. Öncə Amane Sonkonun ötürməsini boşa verdi. Onun zərbəsini dəf etmək Lunyov üçün çətin olmadı. Daha sonra Amane yenidən bəxtini sınadısa, Yankoviç ona mane oldu. Matçın ən həyəcanlı anlarını isə son 90 saniyədə yaşadıq. Bədavi topa başla zərbə vuraraq öz qapısından keçirdi. Yaxşı ki, bundan sonra təhlükəli anların şahidi olmadıq.

Nəhayət, Yucin Cayanın final fiti səsləndi və “Qarabağ”ın Avropa Liqasının pley-offuna yüksəlməsi rəsmiləşdi!

KƏNAN BAHADIR