Sumqayıtda keçirilən matçın hər iki tərəf üçün prinsipial xarakter daşıdığına şübhə yoxdu.

Onsuz da “Neftçi” ilə “Sumqayıt” bir-birinə üçün barışmaz rəqiblərdən sayılır. Diqqətçəkən məqamlardan biri də “kimyaçılar”ın baş məşqçisi Samir Abasovun bu oyundan öncə heyətim məhdudluğuna işarə ilə “kuboku qurban verməliyik” ifadəsini işlətməsi idi. Əlbəttə, təcrübəli məşqçi belə deməklə bakılıların “başının altına yastıq qoymaq” niyyəti də güdə bilərdi.

Matçın ilk yarını izləyən hər kəs Abasovun və “Sumqayıt”ın taleyi ilə barışdığını düşünə bilərdi. Lakin oyunun sonunda başqa məsələlər ortaya çıxdı. “Gənclik şəhəri” təmsilçisi ardıcıl qollarla bakılıların cütün taleyini ilk oyunda həll etmək niyyətinin üzərindən xətt çəkdi. Əslində “kimyaçılar” oyuna yaxşı başlamışdı. İlk dəqiqələrdə “Neftçi”nin uğursuz hücum cəhdi qeydə alındısa, Rövlanın iki ardıcıl zərbəsi qeyri-dəqiq oldu. Ardınca Yeqorun ofsayd üzündən qeydə alınmayan qolunu izlədik. İrəliləyən dəqiqələrdə qonaqların qapısına penalti təyin edildisə, VAR-a müraciət edən Rəşad Əhmədov qərarından döndü. Çünki 15-ci dəqiqədə Tamaşın qapı önündə Sorqaya yox, birbaşa topa müdaxilə etdiyi bəlli oldu. 29-cu dəqiqədə Boqomolski istəyinə çatdı. Belaruslu hücumçu bu dəfə qaydalar çərçivəsində fərqləndi. Beləliklə, gərgin mübarizə şəraitində keçən matçda hesab açıldı. Bundan sonra “Sumqayıt”ın oyun tərzində ciddi geriləmə hiss olundu. Samir Abasovun yetirmələri tutarlı hücum cəhdləriylə yadda qalmır, əksinə, müdafiə xəttində boşluqlara yol verirdi. Belədə komanda qayda pozuntularına səbəb olur, rəqibə növbəti qollar üçün şans verirdi. “Kimyaçılar”ın intizamsızlığını 44-cü dəqiqədə Emin cəzalandırdı. Daha dəqiq desək, Rəşad Əhmədov kapitanı aşkar qol imkanından məhrum edən, həmçinin az qala zədələnməsinə səbəb olacaq müdaxiləyə əl atan Tresora görə penalti təyin etdi. Mahmudov fürsətdən maksimum istifadə edərək fərqi artırdı. Çox keçmədən üçüncü qolu da izlədik. Yeqorun ötürməsindən sonra Emin dublunu rəsmiləşdirdi. Burda “Sumqayıt”ın müdafiə xəttinin kobud səhvini qeyd etməliyik. Nəticədə meydan sahibləri fasiləyə 0:3 hesabıyla yollandı.

İkinci hissə sanki birincinin davamı deyildi. Tərəflər meydanda yerini dəyişmişdi, amma paralel şəkildə güc nisbəti də dəyişmişdi. Ya bəlkə də bakılılar məsələni bitmiş sayaraq meydana çox arxayın çıxmışdı. Hücumların kəsərini azaldan qonaqlar “kimyaçılar”ın sürətli və dinamik oyun tərzi altında əzilməyə başladı. 60-cı dəqiqədə meydan sahiblərini ümidləndirən qol gəldi. Elvin Bədəlov Kehatın ötürməsini qola çevirdi. Əlbəttə, Rövlanın küncdən göndərdiyi topa düzgün istiqamətdə yön verdiyini də qeyd etmək lazımdı. Bundan sonra gah “Neftçi”, gah da “Sumqayıt” hücum edir, fərqlənmək istəyirdi. Lakin Bakıdan gələnlərin bu mənada çox istəkli göründüyünü demək mümkün deyil. Təbii ki, meydan sahibləri flaqmanı müdafiə xəttində yol verdiyi boşluqlara görə bağışlaya bilməzdi. Belədə hesab arasında fərqin minimuma enməsi qaçınılmaz oldu. “Gənclik şəhəri” təmsilçisinin 80-ci dəqiqədə vurduğu qol qaydalar çərçivəsində deyildisə, 89-cu dəqiqədəki qol qeydə alındı. Matias müdafiəçiyə yaraşmayan səhvə yol verib Ninqa üçün şərait yaradırsa, başqa cür ola bilməzdi. Beləliklə, “Sumqayıt” biabırçı ilk yarıdan sonra simasını qorudu və intriqanı Bakıdakı görüşə daşıdı.

Gözdən qaçmadı:
* Sumqayıtlı azarkeşlər “Neftçi”nin futbolçularını şüarlarla təhqir edirdi.
* Samir Abasov Emin Mahmudovun ikinci qolunda qayda pozuntusu olduğunu bildirərək yan xətt hakiminə kəskin etiraz etdi. Baş məşqçinin fikrincə, top “Neftçi”nin futbolçusuna çatmadan meydandan çıxmışdı.

KƏNAN BAHADIR