Oyun günü “Mehdi Hüseynzadə”yə gələnlər özünü gərgin və maraqlı mübarizə üçün hazırlamalıydı.

Təbii ki, buna səbəb qarşılaşacaq komandaların “Sumqayıt” və “Turan Tovuz” olmasıydı. Meydan sahibləri avrokuboklara vəsiqəyə iddialıdısa, qonaqlar da gözünü yüksək pillələrə dikib. Sonuncu dəfə dekabrın 8-də “Qarabağ”a uduzan Samir Abasovun yetirmələri evdə məğlubiyyətsiz oyunlar seriyasını davam etdirməyə çalışacaqdı. Maraq üçün qeyd edək ki, bölgə təmsilçisi çempionatda “Qarabağ”dan sonra ən çox qol vuran komandadı. Həm də bu üzdən oyunun yetərincə baxımlı olacağını düşünmək mümkün idi. Düzdü, yeni stadionda bu dəfə qol səsi eşidilmədi. Amma bu məqam oyunun cansixıcı olduğunu düşünməyə əsas vermir. İcazə verin, qarşılıqlı hücumların, baxımlı epizodların bir-birini izlədiyi matç haqda danışaq. Belə ki, qonaqlar oyun başlar-başlamaz rəqib üzərində təzyiq yaratmağa çalışdı. Belədə “Sumqayıt”ın kövrək müdafiə xəttini yarmaq çətin olmadı. İlk təhlükəli vəziyyəti “Turan Tovuz”un ifasında izlədik. Paçu bacardığı qədər irəliləyib topu Marandiçiyə çatdırdı. Moldovalı müdafiəçi qapı önünə ötürməsini dəqiq etdi ki, Souza hesabı erkən aça bilmədi. Daha dəqiqi, o, topu tora qovuşdurdu. Lakin ofsayd üzündən qol qeydə alınmadı. Bir neçə dəqiqə sonra Ninqanın fərqlənmək cəhdi boşa çıxdı. Hücumçunun zərbəsini Qonçalves dabanıyla müdaxilə edərək zərərsizləşdirdi. Belədə top qapı tiriylə dirəyinin birləşdiyi nöqtəyə dəyərək meydanı tərk etdi. Çox keçmədən “bozqurd”un növbəti həmləsinə şahidlik etdik. Souza meydanın rəqibə aid hissəsində sıxışdırıldığını görüb topu Millerə ötürdü. Panamalı müdafiəçi Elvin və Mehdi cütünün təzyiqinə məğlub olub çaş-baş qaldı. Az sonra Ninqa yaxşı fürsəti dəyərləndirə bilmədi. Birinci hissənin sonunda Suliman Rövlanın cərimə zərbəsindən göndərdiyi topu “çərçivə”yə yönəltsə də, Aydın yerində idi.

İkinci hissədə rəqabət daha da artdı. Çoxsaylı hücum epizodlarının qolla nəticələnməməsi futbolçuları həm yormuş, həm də aqressivləşdirmişdi. Paçu uzaqdan bəxtini sınadı, lakin zərbəsi qapıdan aralı keçdi.

Sona doğru Elvin künc zərbəsini yerinə yetirdi. Mehdinin uzaqlaşdırdığı top yenidən Elvinə qayıtdı. O, isə topu qapı önünə göndərdi. Burda Şəhriyar baş zərbəsiylə fərqləmək istəsə də, qapıçı yenə xilaskar oldu. Ümumiyyətlə, ikinci hissə birinci ilə müqayisədə cansıxıcı və təhlükəli vəziyyətlər baxımından kasad oldu. Sadəcə, uzatma dəqiqələrində həyəcan yaşandı. Sorqa Elvinin ötürməsini rahat qəbul etdi. Artıq cərimə meydançasına daxil olmuşdu ki, Veysəlin müdaxiləsiylə yerə yıxıldı. Amma qayda pozuntusu qeydə alınmadığından hücum cəhdinin davamını izlədik. Kehat komandasını hesabda önə çıxarmaq istəyirdi ki, Bruno ona mane olmaq üçün irəli atıldı. Yan xətt hakiminin ofsayd bayrağını qaldırmasıyla epizoda yekun vuruldu. Çünki Elvin qaydanı pozmuşdu. Bununla matçın nəticəsi bəlli oldu. Hərəyə 1 xal düşdü ki, “Sumqayıt” ikinci pillədəki yerini möhləmlətdi. Əlbəttə, “Turan Tovuz” da səfərdən əliboş dönmədi.

Gözdən qaçmadı
* İlk 20 dəqiqnin geridə qalmasına baxmayaraq, hələ də azarkeşklər bilet alıb matçı izləməyə gəlirdi.
* Ayxan Abbasov hakimə kəskin etiraz bildirirdi.

KƏNAN BAHADIR