“Qarabağ” – “Zirə” oyunu ətrafında intriqa axtaranlar Qurban Qurbanovla Rəşad Sadıqovun personasını müzakirə etməyə öyrəşib. O mənada ki, bunlar uzun müddət birlikdə ağdamlıların uğurları üçün çalışıblar, amma indi əks səngərlərdə dayanıblar. Amma bundan da önəmli olan intriqa nöqtəsi var idi.

“Zirə” indiyə qədər “Qarabağ”a qarşı keçirdiyi 31 oyunun heç birində qalib gəlməmişdi. Təbii ki, bütün seriyaların başa çatdığı gün olur. O gün avqustun 5-nə təsadüf etdi.

"Football-plus.az" xəbər verir ki, ilk yarı qarşılıqlı hücumlar şəraitində keçdi. 22-ci dəqiqədə hesab açıla bilərdi. Amma Maksimin müdafiəçilərin arxasına ötürdüyü topa özünü çatdıran Bədavi ona toxunmaqda çətinlik çəkdi. Heç şübhəsiz, Bədavi məhz bu epizoda görə qəlbinin dərinliklərində çox əzab çəkəcək? Amma niyə Bədavi? Bu sualın cavabı artıq Çantakiasın “Qarabağ”ın qapısına vurduğu qolun təsvirində gizlənir.

24-cü dəqiqənin tamamında “Zirə” də nüfuzlu rəqibə “dişini göstərdi”. Çoxgedişli kombinasiyanın ardından Eldar Fuadın cərimə meydançasına daxil olmasına şərait yaratdı. Ötən mövsüm “Şamaxı”nın heyətində ən fəallardan olan Fuad “Zirə”də dərhal özünü göstərməyə başlayıb. Amma təsvir olunan oyun epizodunda zərbəsi təhlükəli alınsa da, top qapının üstündən keçdi.

İkinci hissə qolla başladı. 48-ci dəqiqədə məhz Fuad künc zərbəsini yerinə yetirdi. Bədavini uşaqcasına mübarizədən kənarlaşdıran Çantakias topu başla qapının elə küncünə göndərdi ki, Ramazanov yox, Kurtua olsaydı belə, komandasını xilas edə bilməzdi. Məğlubiyyətin qoxusunu duyan ağdamlılar qoldan sonra hücumların sayını və kəsərini artırdı. 57-ci dəqiqədə Nəriman Cicanın fərqlənməsi üçün əlindən gələni etdi. Müdafiəçilərin əhatəsindən çıxan Axundzadə penalti nöqtəsi ətrafında qərarlaşan albaniyalı hücumçunu gördü. Amma Cicanın zərbəsi dəqiq olmadı. 72-ci dəqiqədə Benzyanın yerinə yetirdiyi künc zərbəsindən sonra Rahil də hesabı bərabərləşdirə bilərdi. 80-ci dəqiqədə Zubir – Cəfərquliyev – Keyta kombinasiyası zamanı sonuncu qapı önünə çıxsa da, onun təhlükəli ötürməsinin qarşısını Fuad Bayramov aldı. 90-cı dəqiqədə Patrik Andradenin, uzatma dəqiqələrində isə Juninyonun zərbəsi qeyri-dəqiq olunca “Qarabağ”ın məğlubiyyətdən qaça bilməyəcəyi anlaşdı. Beləliklə, tələbə müəllimini cəzalandırdı, “Zirə” isə 32-ci cəhddə axır ki “Qarabağ”ı məğlub etməyi bacardı.

Gözdən qaçmadı
* 82-ci dəqiqədə "İmarət Tayfa" Qurban Qurbanova müraciətlə "transfer elə" şüarını səsləndirdi. Bir qədər sonra isə öz futbolçularına ünvanlanan "Qarabağ", qalxın, futbol oynayaq" şüarları səsləndirdilər.
* Final fitindən sonra fanatlar Şahruddin Məmmədəliyevə dəstək oldular.