Bu qarşılaşmanın favoriti, təbii ki, "Qarabağ" idi. Çempionun autsayderlər qrupunda qərarlaşan rəqiblə oyunda çətinliklə üzləşəcəyini ən bədbin azarkeşlər belə təxmin edə bilməzdi. Üstəlik Ağdam təmsilçisi çempionluğu rəsmiləşdirdikdən sonra baş məşqçi Qurban Qurbanov qalan oyunlara da ciddi hazırlaşacaqlarını demişdi.

"Football-plus.az" xəbər verir ki, hakimin start fitindən etibarən qonaqlar cari mövsümdəki digər oyunlardakından fərqli təəssürat oyatmağa başladı. "Sumqayıt"ın premyer-liqanı tərk etmək ehtimalı az olsa da, Samir Abasovun yetirmələri bunu nəzərə almışdı. İlk hissənin ilk 15 dəqiqəsində performans tərəzisində fərq gözə dəymədi. Nəhayət, “Qarabağ” rəqibini narahat etdi. Nəriman topu "Sumqayıt"ın cərimə meydançasına göndərdi. Ramil ötürməni qəbul edib zərbəyə hazırlaşırdı ki, Musanın müdaxiləsi planları pozdu. Onun qapıya vurmaq istədiyi zərbə dəqiqlikdən xeyli kənar oldu.

"Köhlən atlar"ın hücum planları bundan sonra da yolunda getmədi. Uzaqdan göndərilən “raketlər” də işə yaramadı, Şeydayevin yaxından vurduğu zərbələr də. "Kimyaçılar"ın qolkiperi Aydın Bayramov tirlə birlikdə rəqiblə "vuruşdu". "Sumqayıt" "Qarabağ" müdafiəsini yarmağa başlayana qədər. Bədavi qapı önünə qədər irəliləyən Kamranı yerə yıxmaqla qolun qarşısını aldı ki, bu da Rəşad Əhmədovun penalti nöqtəsini göstərməsinə səbəb oldu. Vüsal İsgəndərli 33-cü dəqiqədə təyin edilən penaltini qola çevirməklə komanda yoldaşının qisasını aldı. Bundan sonra "köhlən atlar"da ruh düşkünlüyü hiss olunmağa başladı. Artıq sumqayıtlılar təkbətək mübarizələrdə rəqibi asanlıqla keçir, qol vəziyyətləri yarada bilirdi. 5 dəqiqə sonra "Qarabağ"ın qapısı önündə paslaşmalarla qapıçının başını gicəlləndirən Kamran - Səbuhi cütlüyü işini gördü və Abdullazadə "Sumqayıt"ın ikinci qoluna imza atdı. Sakit davam edən bir neçə dəqiqədən sonra çempionun qənaətbəxş mövsüm keçirməyən "kimyaçılar"a müqavimət göstərə bilmədiyi ilk hissə sona çatdı.

"Qarabağ" ikinci hissədə nisbətən yaxşı təsir bağışladı. "Sumqayıt" isə öz ampulasında idi. 2 top fərqi qonaqları rahatlatmamışdı. "Köhlən atlar"ın Cicası 66-cı dəqiqədə qapını uzaqdan nişan alsa da, qeyri-dəqiq oldu. Ardınca Kamran Süleymanın qapı qarşısına ötürməsindən yararlana bilmədi. 79-cu dəqiqədə isə Mustafayev topu ayağına yenicə "oturtmuş" Elvinin qarşısını sərt müdaxilə ilə aldı. Rəşad Əhmədovun fiti bu dəfə "köhlən atlar"ın penalti şansını rəsmiləşdirdi. Şeydayevə həvalə olunan zərbənin qarşısını almaq Bayramov üçün çətin olmadı. Son dəqiqələrdə "Sumqayıt"ın futbolçularının yorğunluğu rəqibə nisbətən daha çox hiss olunurdu. Ötürmələr belə dəqiq alınmırdı ki, bu da "Qarabağ"ın fərqi minimuma endirməsinə səbəb oldu. Almeyda hücuma keçmək istəyən "kimyaçılar"dan aldığı topu dərhal qapıya göndərdi. Bayramov zərbənin qarşısını ala bilmədi. Uzatma dəqiqələrində isə təhlükəli vəziyyət qeydə alınmadı. Çempion üzərindəki qələbə "Sumqayıt"ın premyer-liqanı tərk etmək ehtimalını sıfra endirdi.

Gözdən qaçmadı
* Havanın isti olması üzündən komandalar meydana matçın başlamasına 2-3 dəqiqə qalmış çıxdı.
* “İmarət Tayfa” yeni bannerlərlə həmişəki yerini almışdı. “Qarabağ Ordu” da komandaya 90 dəqiqə dəstək verdi. “Kimyaçılar”ın sayı az olsa da, sevimli komandalarını sonadək irəli səslədilər.
* “İmarət Tayfa” ilə “Qarabağ Ordu” çempionluqla bağlı qarşılıqlı bəstə oxudu.
* “İmarət Tayfa” “Neftçi”nin sabiq baş məşqçisi Samir Abasova da “ilişdi”: “Samir, “Neftçi”ni çempion elə”, “Samir, Kamran səni axtarır”, “Samir, həkimi dəyiş”.
* 81-ci dəqiqədə “Qarabağ” 11 metrlik cərimə zərbəsi vurmaq hüququ qazandı. Topa Ramil Şeydayev yaxınlaşsa da, bütün tribunalar “Musa, Musa”, - deyə Qurbanlını səslədi. Şeydayev penalti duelində qapıçıya uduzandan sonra da bu şüar davam etdi.