Srağagün ölkə kubokunda 1/4 final mərhələsinin oyunlarına start verildi.

Açılış görüşündə “Səbail” “Zirə”ni qəbul etdi. Oyunun qarşılıqlı mübarizə şəklində keçəcəyi gözlənilən idi. Lakin ilk dəqiqələrdən etibarən “Zirə”nin üstünlüyü açıq-aşkar görünürdü. Elə bu əzmkarlıq matçın 11-ci dəqiqəsində “qartallar”ı Salifu Sumanın qüvvət zərbəsiylə hesabda önə çıxaracaqdı ki, “dənizçilər”in qolkiperi Hüseynəli Quliyev bu vuruşun qarşısını soyuqqanlı şəkildə aldı. Növbəti təhlükəli vəziyyət “Səbail”in oyunçularının ifasında baş verdi. Əks-hücum zamanı rəqibi azlıqda yaxalayan meydan sahibləri 26-cı dəqiqədə hesabı açmağa yaxın olsa da, Stefan Akaya tuş gələn Ramalinqomun zərbəsi “çərçivə”yə getmədi. Cəmi 4 dəqiqə sonra Eldarın gözəl ötürməsiylə qapıçıyla üzbəüz qalan Utziqdə azca dəqiqlik çatmadı.

Komandaların mübarizə əzmi 2-ci hissədə də azlmadı. Elə ilk dəqiqələrdən pressinq hesabına rəqibi təzyiq altında saxlayan “qartallar” 48-ci dəqiqədə qol istəyinə çatdı. Anas Najah Rəhim Sadıxovun iti bucaq altndan Utziqə göndərdiyi ötürmənin qarşısını almaq istəyərkən yanlış toxunuşla topu öz qapısına göndərdi – 0:1. Bu qoldan sonra təzyiqi bir qədər də artıran zirəlilər 51-ci dəqiqədə növnəti təhlükəli vəziyyət yaratdı. Sadəcə, Salifu Sumanın zərbəsi bir az kəsərsiz oldu. Meydan sahibləri hər nə qədər çalışsalar da, hücum qurmaqda çətinlik çəkirdilər. Qarşılığında isə növbəti dəfə cəzalanaraq meydançanın mərkəzinə dəvət olundular. 59-cu dəqiqədə Qismət Alıyevin künc zərbəsindən qapı qarşısına göndərdiyi ötürməni oyunun yaxşılarından olan Renato başla “9-luğ”a göndərməyə nail oldu – 0:2. Bu qoldan sonra toparlanmağa başlayan Diniyevin yetirmələri artıq müdafiə olunmur, rəqibin cərimə meydançası yaxınlığında yavaş-yavaş topa nəzarəti ələ keçirirdi. 69-cu dəqiqədə Vladislav Kulaçın Anas Najaha qarşı etdiyi kobudluğa görə İnqilab Məmmədov “Zirə”nin qapısına cərimə zərbəsi təyin etdi. Topun arxasına keçən “Səbail”in ən məhsuldar oyunçusu Aleksandr Ramalinqom standart vəziyyətdən baxımlı qola imza atdı – 1:2. Aradakı xal fərqinin minimum enməsi hər iki komandanın daha aqressiv oyun nümayiş etdirməsinə səbəb olurdu. Bərabərlik axtarışında olan “Səbail” futbolçuları 76-cı dəqiqədə buna yaxın idi. Ayub Masikanın Adil Nağıyevin cərimə meydançasına göndərdiyi ötürməni saxlamadan, top havada ikən qüvvətli zərbəylə yaxın küncə göndərməsinə baxmayaraq, qapıçı Tyqao Silva tablodakı rəqəmlərin dəyişməsinə mane oldu. Bir qədər sonra Ramalinqom günün qəhrəmanı olmağa yaxın oldu. Lakin zərbəsi qapıdan azacıq aralı keçdi. Oyunun irəliləyən dəqiqələri də “Səbail”in hücumları, “Zirə”nin əks-hücumları fonunda keçdi. Qapılara başqa qol vurulmadı və oyun bu hesabla yekunlaşdı. Beləliklə, 1/4 finalın ilk oyununda minimal fərqlə qalib gələn “Zirə” cavab görüşünə bir addım öndə başlayacaq.

Gözdən qaçmadı:
* Şahin Diniyev komandasının oyununa görə necə əsəbləşdisə, ehtiyat oyunçular skamyasını yumruqladı.
* Adil Nağıyev əsəbləşərək matçın 4-cü hakiminə “belə şey olmaz” dedi. Bir epizodda isə kapitanın sərt şəkildə etiraz etdiyini görən İnqilab Məmmədov ona “çıx get burdan” dedi.
* 59-cu dəqiqədə Yusif Nəbiyevlə mübarizədə ağır zədələnən Eldar Quliyev əvəzləndikdən sonra paltardəyişmə otağına yollandı.

KAMAL SƏFƏR