Daniel Alveşin aqibəti müəyyənləşib. Məşhur futbolçu cəzasını alıb.

“Football-plus.az” xəbər verir ki, İspaniya məhkəməsi onu cinsi zorakılıqda təqsirkar bilib. Braziliyalı futbolçu 4,5 il müddətinə azadlıqdan məhrum edilib. Buna onun 2022-ci ilin dekabrında Barselonadakı gecə klublarından birində bir qıza qarşı seksual təcavüzə əl atması səbəb olub. Daniel bu hadisədən bir neçə həftə sonra – 2023-cü il yanvarın 20-də saxlanılmışdı. O, həmin vaxtdan azadlığını itirmiş və bir neçə dəfə bir-birinə zidd ifadə vermişdi. Həmin qızla arasındakı intim əlaqənin qarşılıqlı razılıq əsasında baş verdiyini deyən futbolçu heç bir zorakılığa əl atmadığını iddia etmişdi. Lakin məhkəmə uzun təhqiqatdan sonra karyerası ərzində “Bayya”, “Sevilya”, “Barselona”, “Yuventus”, PSJ, “San Paulu” və UNAM klublarında çıxış edən 40 yaşlı müdafiəçini müqəssir bilib.

“AS” qəzeti fevralın 5-də onun vəkillərinin prokurorluq və zərərçəkən ilə razılığa gəlmədiyi haqda məlumat yaymışdı. Prokurorluq məhkəmədən Danielin 9 il müddətinə həbsini və qıza mənəvi təzminat kimi 150 min avro ödəməsini istəmişdi. Maraqlıdı ki, bu təzminatı zərərçəkənə Neymarın ailəsi ödəyib. Nəticədə hakim onun tələb olunan müddətin yarısını real, qalan yarısını isə şərti cəza kimi çəkməsinə qərar verib. Amma səbəbkar qərarla barışmır və apellyasiya vermək hüququndan istifadə edəcək. Onun vəkili İnes Qvardiola jurnalistlərə belə açıqlama verib: “Biz şikayət edəcəyik. Mən Daninin günahsız olduğuna inanıram”.