Belədə başqa nə deyəsən?!

"Football-plus.az" xəbər verir ki, qonaqlar nə qədər çətin olsa da, güclü rəqibin təzyiqinə 70 dəqiqə davam gətirə bildi. “Arılar” meydanda heç nə ortaya qoymasalar da, öz qapıları önündə də ciddi təhlükə yaradılmasına imkan vermirdilər. Hər halda, “Siti” ilk yarıda üç dəfə hesabı aça bilərdi. Bernardo Silva əla vəziyyətdən qapıya yol tapa bilmədi, Diaşın zərbəsindən sonra qapıçı “Brentford”u xilas etdi, Bobbun boş qalan küncə zərbəsinin qarşısını Mi aldı. “Arılar”ın heyətində isə Onyeka ilə Touni seçilirdi. Fasilədən sonra qonaqlar, ümumiyyətlə, hücum etmək fikrindən daşındı, “şəhərlilər” də çətinliklə təhlükəli vəziyyət yaradırdı. Ancaq sona 19 dəqiqə qalmış Ayer meydanın “Brentford”a aid hissəsində sürüşərək topu Holanna “bağışladı”, o isə futbol bullitindən inamla yararlandı. “Şəhərlilər” bundan sonra əsasən topa nəzarət etməklə məşğul oldu. Hərçənd top daha bir dəfə “Brentford”un qapısından keçdi. Holann bu dəfə ofsayddan fərqləndi. Yeganə qolla qələbə qazanan “Siti” “Arsenal”ı arxada qoyaraq turnir cədvəlinin 2-ci pilləsinə yüksəldi. “Brentford” isə əvvəlki kimi təhlükəli zonada qərarlaşıb.

18-ci turdan təxirə salınan oyun
Mançester Siti – Brentford 1:0
Holann, 71. (52247)
MS: Ederson, Akanci, Diaş, Uoker, Stounz, Rodri, Foden, Alvares (Kovaçiç, 89), Bobb (Dokyu, 61), B.Silva, Holann.
1. Liverpul – 57, 2. Mançester Siti – 56... 14-15. Brentford, Kristal Pelas – 25...
Bombardir: Holann (MS) – 17.

Faktlar
* Yeganə qolu vuran Holann bombardirlər yarışında liderliyini möhkəmlətməklə yanaşı, daha bir unikal nəticənin müəllifi oldu. Norveçili forvard indiyə qədər premyer-liqada rəqib olduğu 21 komandanın hər birinin qapısına yol tapıb. Amma o, premyer-liqa tarixində yeganə belə futbolçu deyil. Belə ki, hazırda “Bavariya”nın formasını geyən Keyn də premyer-liqada qarşılaşdığı 32 komandanın hər biri ilə oyunda fərqlənib.
* “Mançester Siti”nin qapıçısı Ederson premyer-liqa rekordunu təkrarlayıb. Braziliyalı qolkiper “Brentford”la oyunda qol buraxmayaraq, “Siti”nin tarixinə düşüb. Bu, 30 yaşlı futbolçunun “şəhərlilər”in heyətində ölkə çempionatında qapısını toxunulmaz saxladığı 109-cu oyun olub. Ederson bunu 241-ci qarşılaşmasında reallaşdırıb. O, Co Harta məxsus klub rekordunu təkrarlayıb. Hart 266 matçda bu göstəriciyə çatıb. Qeyd edək ki, Ederson 2017-ci ildən “Mançester Siti”nin formasını geyir.