Real – Mançester Siti 1:1 (1:0)
Real (Madrid, İspaniya): Kurtua, Karvaxal, Rüdiger, Alaba, Kamavinqa, Valverde, Kroos (Çuameni, 84), Modriç (Naço, 87), Rodriqo (Asensio, 81), Benzema, Vinisius.
Mançester Siti (İngiltərə): Ederson, Uoker, Stounz, Diaş, Akanci, Rodri, Gündoğan, De Bruyne, B.Silva, Holann, Qriliş.
Qollar: Vinisius, 36 (1:0). De Bruyne, 67 (1:1).
Vərəqələr: Kroos, 45+3. Gündoğan, 71. Kamavinqa, 79. B.Silva, 86 – sarı.
Hakim: Artur Diaş (Portuqaliya).
9 may. Madrid. 63485 tamaşaçı.
Cavab oyunu mayın 17-də keçiriləcək.
oyunun statistikası
13 (3) qapıya (“çərçivə”yə) zərbə 10 (6)
8 künc zərbəsi 7
0 ofsayd 2
11 qayda pozuntusu 11
2 (0) sarı (qırmızı) vərəqə 2 (0)
43 topa sahibolma (faizlə) 57

“Real”la “Mançester Siti” ardıcıl 2-ci il ÇL-in yarımfinalında üz-üzə gəlir. Ötənilki oyunlar möhtəşəm alınmışdı, xüsusən də cavab görüşü. Qvardiolanın komandası 90-cı dəqiqəyə qədər hesabda 1:0 öndə olsa da, madridlilər qalan müddətdə iki qol vurmaqla oyunu əlavə vaxtda daşıdı, orda isə Benzema həlledici qolu vurdu. Yenə ehtiraslı mübarizə gözləyən azarkeşlər arzusuna çatdı.

Meydana gözlənilən heyətlər çıxdı. Hər komandanın bir itkisi var idi – Militao cəzalıydısıa, Ake zədələnmişdi. Ançelotti təəccübləndirdi, ancaq heyət seçimi ilə yox, taktika ilə. “Real” səfər oyunlarında topu bəzən rəqibə verir, evdə, adətən, özünü meydan sahibi kimi aparır. Ancaq madridlilər bu oyuna gözlənilmədən passiv başladı. İlk 15 dəqiqədən sonra topa nəzarət faizi 73-ün 27-yə nisbətində qonaqların xeyrinə idi. Bütün komponentlərdə yaxşı olan “Siti” qapıya zərbə vurmağı da unutmurdu. De Bruyne, Rodri və iki dəfə Holann “çərçivə”yə düşdü, ancaq bunları qol vəziyyəti adlandırmaq olmaz. Çox güman, qonaqlar oyunun məhz elə bu axarla davam edəcəyini düşünürdü. Ancaq sonradan göründü ki, “Real”, sadəcə, rəqibin ayıq-sayıqlığını yoxlayırmış. Meydan sahibləri bir müddət də gözləyəndən sonra “şəhərlilər”i əks-hücumlarla “sancmağa” başladılar. “Real” oyunöncəsi məşqlərdə meydanın bütün hissələrində pressinq etmək üzərində işləmişdi və bu açıq-aydın görünürdü.

İlk yarının ortalarında Rodri Vinisiusun təzyiqi altında cərimə meydançası önündə səhvə yol verdi, ancaq Diaş son anda Benzemanın ötürməni tamamlamasına imkan vermədi. Ötən avrokubok mövsümü hər kəsi “Real”ı vaxtından əvvəl “dəfn etməməyə” öyrədib. Əlbəttə, ilk yarıda bundan söhbət gedə bilməzdi. Sadəcə, madridlilər bir daha göstərdi ki, topsuz oynamaq və qapıya bir dəfə də zərbə vurmamaq fonunda belə, qəfil yay kimi gərilib hesabı aça bilir. Özü də “Real” əks-hücum yox, sürətli hücum sonucunda fərqləndi. Kamavinqa sürətlə irəli atıldı, ondan ötürmə alan Vinisius qapıya gözlənilməz zərbə vurdu. Fasiləyə qədər təkcə futbolçular yox, portuqaliyalı hakim Artur Diaş da diqqət mərkəzində oldu.

O, bəzi məqamlarda mübahisəli qərarlar - əsasən də “Real”ın xeyrinə - verdi. 1-ci hissənin ortalarından etibarən qonaqlar təşəbbüsü əldən verdi. Xüsusən də Holann məyus etdi – norveçli ulduz oyunun sonuna qədər Rüdigerin fərdi himayəsindən qurtula bilmədi. Ancaq “Siti” qol vurmaq üçün başqa yol tapdı. Ümumiyyətlə, fasilədən sonra oyunun axarı kəskin şəkildə dəyişdi. Qvardiola bilərəkdən və ya bilmədən topu rəqibə verdi, ancaq madridlilər sanki “1-ci skripka” kimi oynamağa hazır deyildi. Qonaqlar isə məzmun dəyişikliyinə tez uyğunlaşdı və təhlükəli vəziyyətlər yaratmağa başladı. De Bruyne fəallığı ilə seçilirdi. Belçikalı oyun canlanandan sonra 10 dəqiqə ərzində iki dəfə Kurtuanın qapısına yol tapa bilərdi, sadəcə, qapıçı həmvətəni bu zərbələrin öhdəsindən gəldi. Kevinin 67-ci dəqiqədəki zərbəsi isə qarşısıalınmaz oldu. Madridlilərin topu meydanın özünə aid hissəsində itirməsi bərabərlik qoluna gətirib çıxardı. Əlbəttə, “Real” təslim olmadı. Bu, komanda, ümumiyyətlə, “ağ bayraq qaldırmağın” nə demək olduğunu bilmir. 2-ci hissədə “kral klubu”nun oyununda heç də hər şey alınmasa da, sonluq meydan sahiblərinin tərəfində oldu: Benzema başla təhlükəli zərbə vurdu, əsas vaxtın sonunda yenicə meydana çıxan Çuameninin zərbəsinin qarşısını Ederson çətinliklə aldı. Bir sözlə, tamaşaçılar başqa qol görmədi. Bu duelin taleyi artıq Mançesterdə həll olunacaq. Orda isə istənilən sürpriz mümkündü.

Faktlar
* Heç bir məşqçi Çempionlar Liqasında Karlo Ançelottidən çox oyun keçirməyib. O, srağagün bu turnir çərçivəsində 190-cı oyuna çıxdı. İtaliyalı mütəxəssis vaxtilə “Mançester Yunayted”ə rəhbərlik edən Aleks Ferqyusonun rekordunu təkrarladı. Bu iki rekordçunun ardından Arsen Venger (184) və Pep Qvardiola (159) gəlir.
* De Bruynenin “Mançester Siti”nin heyətində ÇL-də vurduğu 14 qoldan 11-i turnirin pley-offuna təsadüf edib. Pley-offda 11 qol İngiltərə klublarının oyunçuları üçün ən yaxşı nəticədi.
* “Siti”nin məğlubiyyətsiz oyunlar seriyası 21-ə çatdı. Sonuncu dəfə fevralın 5-də “Tottenhem”ə uduzan (0:1) “şəhərlilər” həmin vaxtdan bəri keçirdiyi oyunların 17-də qalib gəlib, 4-də heç-heçə edib.
* “Siti” son 5 oyunun yalnız birində “Real”a uduzub. “Şəhərlilər” 2020-ci ilin fevralından etibarən ardıcıl üç oyunda madridlilərə qalib gəlib, yalnız ötənilki yarımfinalda məğlub olub (1:3).
* Ançelotti son üç ildə yalnız bir dəfə Qvardiolaya qalib gəlib. Onda “Everton”u çalışdıran italiyalı mütəxəssis 2020-ci il yanvarın 1-dən 2021-ci il mayın 23-nə qədər olan dövrdə Qvardiola“nın çalışdırdığı “şəhərlilər”ə qarşı keçirdiyi 4 oyunun hamısında uduzub. Ötən il aprelin 26-da artırq “Real”ın “sükanı arxasında” olan Ançelotti ÇL-in yarımfinalında yenə “Siti”yə uduzub (3:4), ancaq mayın 4-də qisas alıb – 3:1. Beləliklə, italiyalının son 7 oyunda ispaniyalı həmkarı üzərində yalnız bir qələbəsi var. Ümumiyyətlə, onlar 9 dəfə üz-üzə gəlib: Ançelottinin 3, Qvardiolanın 5 qələbəsi var.

Ekspert fikri
Eduardo İturralde Qonsales, sabiq hakim (top meydanı tərk etdiyi halda De Bruynenin qolunun ləğv olunmamasıyla bağlı izahı):