Dünən Yunanıstan kubokunda ilk finalçı bəlli oldu.

"Football-plus.az" xəbər verir ki, Fatih Terimin ''Panatinaikos''u Razvan Luçeskunun çalışdırdığı PAOK-u qəbul etdi. ''Apostolos Nikolaidis'' stadionunda keçirilən oyun çox dramatik anlara səhnə oldu. Qeyd edək ki, ''Panatinaikos'' ilk görüşdə səfərdə rəqibini 1:0 hesabı ilə üstələmişdi. Cavab oyunu ''İmperator''un kollektivi üçün heç də asan keçmədi. PAOK 72-ci dəqiqədə Jivkoviç ilə qol vuraraq matçı əlavə vaxta daşıdı. 105-ci dəqiqədə Kedziora meydan sahiblərini şoka salaraq PAOK-un üstünlüyünü artırdı. Oyunun 117-ci dəqiqəsində rəqib futbolçu ilə çarpışaraq huşunu itirən qonaqların üzvü Baba Rəhman birbaşa xəstəxanaya aparıldı. Hakim ikinci əlavə olunmuş hissəyə 10 dəqiqə əlavə etdi və 129-cu dəqiqədə Lemnios ''Panatinaikos''un xilaskarına çevrilərək hesabı 1:2 etdi. Penaltilər seriyasında da inanılmaz hadisələr baş verdi. 3 dəfə elə durum yarandı ki, PAOK-lu futbolçular son zərbəni vurmaq üçün topun başına keçdilər. Yəni bu zərbələrdən heç olmasa, biri qolla nəticələnsəydi PAOK ardıcıl 4-cü dəfə finala yüksələcəkdi. Amma ''Pana''nın qapıçısı Bartlomey Draqovski tarixi bir performans ortaya qoydu. 26 yaşlı bolqarıstanlı əlcək sahibi ən vacib məqamda hər üç penaltini dəf etdi! Nəticədə ''Panatinaikos'' penaltilər seriyasında 6:5 hesabı ilə qalib gələrək tarixində 31-ci dəfə ölkə kubokunun finalına yüksəldi. Afina nəhəngi 1/8 finalda digər prinsipial rəqib ''Olimpiakos''u da penaltilər seriyasında məğlub etmişdi. Terimin komandasının finaldakı rəqibi bu gün baş tutacaq ''Aris'' - ''Panetolikos'' (ilk oyun - 1:0) matçında bəlli olacaq. Onu da bildirək ki, ''Panatinaikos'' ölkə kubokunu sonuncu dəfə 2022-də qazanıb.

ƏLİ