Fransa çempionatının 22-ci turundan sonra artıq PSJ-yə qızıl medalları təqdim etmək olar.

"Football-plus.az" xəbər verir ki, Luis Enrikenin komandası “Nant”la səfər oyununda yaxşı təsir bağışlamasa da, 2:0 hesabıyla qələbə qazana bildi. Liderin ən yaxın izləyicisi ondan artıq 13 xal geri qalır. 2-ci pillədə 60-cı dəqiqədə azlıqda qalsa da, “Marsel”in qapısından qələbə topunu 89-cu dəqiqədə keçirən “Brest” qərarlaşıb. Yeri gəlmişkən, bu məğlubiyyət Cennaro Qattuzoya baha başa gəldi. “Marsel” rəhbərliyi oyundan sonra ötən ilin sentyabrından “sükan arxasında” olan italiyalı mütəxəssisə istefaya göndərildiyini bildirdi.

“Nitsa” və “Monako” uğursuz nəticələrlə PSJ-nin “çörəyinə yağ sürtür”. “Qartallar” səfərdə “Lion”a uduzdu. Pyer Saj “şirlər”i həyata qaytarıb, onlar yavaş-yavaş turnir cədvəlinin zirzəmisindən uzaqlaşmaqdadı. İlk yarıda daha yaxşı təsir bağışlayan meydan sahibləri 22-ci dəqiqədə hesabı açdı. 2-ci hissədə isə “Nitsa” üstün idi, nəinki hesabı bərabərləşdirməyə, hətta qələbə qazanmağa bəs edəcək qədər təhlükəli vəziyyət yaratdı. Ancaq bəxt “Lion”un üzünə güldü.

“Monako” cəzalı Qolovinin yoxluğunda evdə “Tuluza”ya uduzdu. Bu məğlubiyyət “knyazlar”a iki pillə geriləmək bahasına başa gəldi. İş ondadı ki, “Brest”lə yanaşı, “Lill” də onları arxada qoydu. “Şimallı itlər” evdə elitanın debütantı “Havr”ı darmadağın etdi. 14-cü dəqiqədə standart vəziyyətdən sonra Devid hesabı açdı. Fasilə ərəfəsində kanadalı forvard daha bir qol vurdu. Fasilədən dərhal sonra Unasın qazandığı penaltini Devid qola çevirə bilməsə də, qapıçıdan dönən topa özünü yetirib fərqi darmadağın həddinə çatdırdı.

Turun qalan oyunlarına gəlincə, “Reyms”lə “Lans” 1:1 hesablı heç-heçəyə razılaşdı. “Renn” “Klermon”, “Monpelye” “Mets” üzərində inamlı qələbə qazandı, “Strasbur” isə evdə “Loryan”a uduzdu.

22-ci tur
Lion – Nitsa 1:0
Manqalya, 22. (48033)
Nitsa: Bulka, Bar, Ndaişimay (Klod-Moris, 59), Todibo, Lotomba, Rosario, Türam, Sanson (Luşe, 71), Şo (Balde, 81), Gessand (Moffi, 59), Lyabord (Boqa, 59).
Lill – Havr 3:0
Devid, 14; 44; 49. (40317)
Lill: Şevalye, İsmaili, Aleksandro, Yoro, Santuş, Bentaleb (Haraldsson, 65), Andre, Unas (Jeqrova, 65), Qomes (Buaddi, 82), Kabella (Moraiş, 75), Devid (Yazıcı, 75).
Nant – PSJ 0:2
L.Ernandes, 60. K.Mbappe, 78-p. (34038)
PSJ: Donnarumma, L.Ernandes, Pereyra, Markinyos (Beraldo, 70), Zair-Emeri, Li Kan İn (Dembele, 62), Uqarte, Vitinya, Barkola (Ramuş, 46), Kolo Muani (Hakimi, 62), Asensio (E.Mbappe, 62).
Monako – Tuluza 1:2
Akliuş, 48 – Syerro, 41. Koşta, 70. (4702)
Monako: Ken, Yakobs (Uattara, 79), Salisu, Maripan, Kerer, Fofana, Zakariya, Kamara (Kulibali, 25), Akliuş, Baloqun (Ben Seqir, 71), Minamino.
Strasbur – Loryan 1:3
Jilber, 51 – Bamba, 2; 45+2. Ponso, 49. (25103)
Renn – Klermon 3:1
Omari, 31. Terrye, 58; 64 – Matsima, 62. (27501)
Monpelye – Mets 3:0
Silla, 3. Sanyan, 50. Savanye, 85-p. (12532)
Reyms – Lans 1:1
Diakite, 41 – Said, 45+1. (20116)
Brest – Marsel 1:0
Lis-Melu, 89. (13800)
1. PSJ 22 16 5 1 53-18 53
2. Brest 22 11 7 4 31-18 40
3. Nitsa 22 11 6 5 22-15 39
4. Lill 22 10 8 4 32-17 38
5. Monako 22 11 5 6 41-32 38
6. Lans 22 10 6 6 28-21 36
7. Renn 22 9 7 6 34-26 34
8. Reyms 22 9 4 9 28-30 31
9. Marsel 22 7 9 6 29-24 30
10. Strasbur 22 6 7 9 23-32 25
11. Lion 22 7 4 11 23-34 25
12. Havr 22 5 9 8 23-28 24
13. Tuluza 22 5 8 9 22-30 23
14. Monpelye 22 5 8 9 24-27 22
15. Loryan 22 5 7 10 31-43 22
16. Nant 22 6 4 12 22-34 22
17. Mets 22 4 5 13 18-35 17
18. Klermon 22 3 7 12 16-36 16
Bombardirlər: K.Mbappe (PSJ) – 20, Ben Yedder (Monako), Lakazett (Lion), Devid (Lill) - 11.
Növbəti turun oyunları fevralın 23-25-i aralığında keçiriləcək: Mets – Lion, Loryan – Nant, Strasbur – Brest, Lans – Monako, Havr – Reyms, Tuluza – Lill, Nitsa – Klermon, PSJ – Renn, Marsel – Monpelye.

Turun rəqəmi
1 – “Loryan”ın hücumçusu Məhəmməd Bamba son 50 ildən artıq müddətdə Liqa 1-də keçirdiyi ilk 4 oyunun hər birində fərqlənən yeganə futbolçudu. Sonuncu dəfə bunu 1973-cü ilin oktyabrında “Strasbur”un oyunçusu Giora Şpigel bacarıb.

Turun ulduzu
Conatan Devid (Lill) – kanadalı hücumçu komandası üçün “qol maşını” rolunu oynayır. “Havr”la oyunda het-trik etməklə bombardirlər yarışına qoşuldu. Özü də başqa bombardirlərdən fərqli bütün qolları oyun vəziyyətindən vurub. Devidin artıq qitə nəhənglərinin maraq dairəsinə düşməsi təsadüfi deyil.

Turun sitatı
Adi Hütter, “Monako”nun baş məşqçisi: “Bu mövsüm hədsiz çox eniş-yoxuşumuz var. Bunu və “Havr”la oyunu götürsək, 33 zərbəmiz olsa da, cəmi iki qol vurmuşuq. Qol vəziyyətlərindən yararlana bilmirik. Digər tərəfdən, standart vəziyyətlərdən çox asan qollar buraxırıq. Başverənləri təhlil etmək çox çətindi”.

Faktlar
* Bu mövsüm yalnız iki futbolçu keçirdiyi oyun sayından çox qol vurub. Bunlar Kilian Mbappe (20 oyun, 21 qol) və Məhəmməd Bambadı (4 oyun, 5 qol).
* PSJ son 18 oyunda məğlubiyyət üzü görməyib. Luis Enrikenin komandası ötən il noyabrın 7-də Çempionlar Liqasında “Milan”a uduzandan sonra keçirdiyi oyunların 14-də qələbə qazanıb, 4-də heç-heçə edib.
* Mbappe PSJ-nin heyətində keçirdiyi son 11 oyunun 10-da fərqlənib (14 qol). Son iki ayda 14 qol vurub. Gənc ulduz dekabrın 17-dən bəri meydana çıxdığı oyunlarda yalnız “Brest”in qapısına yol tapa bilməyib.