“Çox şükür, bizim də baş sponsorumuz oldu. Öncəliklə FİF-in icraçı direktoru Tural Piriyev başda olmaqla, bütün əməkdaşlarına və bu işdə əziyyəti olan şəxslərə təşəkkür edirəm. Düzdü, indiyə qədər ciddi çatışmazlıqlarla üz-üzə olmuşuq. Hələ ki şirkətin bizə nə qədər məbləğ ödəyəcəyi bəlli deyil. Hazırda layihə araya-ərsəyə gətirilir ki, problemlər və həll yoları ilə konkret tanış olaq. Bundan sonra rifahımız üçün nə qədər pula ehtiyac olduğu bilinəcək. Artıq “Music Gallery”in reklam lövhələrini stadiona yerləşdirmişik. Formalarımızda da şirkətin loqosu olacaq. Onu deyim ki, kluba əlavə maliyyə vəsaitinin cəlb edilməsi yönündə işlər davam edir. Başqa köməkçi sponsorlarla da anlaşa bilərik. Məsələlər müzakirə mərhələsindədi. İş adamlarıyla danışırıq. Ümid edirəm ki, maddi baxımdan daha güclü ola biləcəyik. Lakin bu o demək deyil ki, durumumuzdan şikayətçiyik. Sağ olsunlar, bəzi iş adamları və şirkətlər bizə kömək etməyə çalışıb və çalışır”.

“Təbii ki, çempion olmaq istəyirik. Təəssüf ki, indiyə qədər xeyli xal itirmişik. Bu mövsüm bacardığımız qədər yuxarı pillələrdə qərarlaşmağı hədəfləmişik. İnşallah, növbəti “futbol ili”nə daha fərqli hazırlaşacağıq”.