Şaban Şirdanov: “İlboyu sponsor axtarışımız davam edəcək” - AÇIQLAMA
Birinci liqa təmsilçisi "Zaqatala"da gözlənilməz dəyişiklik gerçəkləşdi.
"Football-plus.az" xəbər verir ki, illərdi kluba rəhbərlik edən Musa Qurbanov prezident vəzifəsindən istefa verdi. Onu isə Şaban Şirdanov əvəzlədi.
Yeni prezidentin gəlişiylə komandada hansı yeniliklər gözlənilir? Bu sualı aydınlaşdırmaq üçün Şaban Şirdanova müraciət etdik:
"Futbol ictimaiyyəti bu ildən çoxdan gözlənilən, yeni formatda yarışların şahidi olacaq. İdman prinsipinin işləməsi liqalara əlavə rəng qatacaq. "Zaqatala" ötən il hətta premyer-liqa üçün də lisenziya almışdı. Əsas problem sponsor tapa bilməməyimizdi. Amma ümidimizi itirmirik, ilboyu axtarışımız davam edəcək. Baş məşqçiylə görüşüb müzakirələr apardıq. Rüstəm Məmmədov 1-ci liqada yaxşı təcrübə qazanan mütəxəssisdi. Ona görə də onunla razılığa gəlmişik. Növbəti mövsümdə də komandaya rəhbərlik edəcək. Hazırda seleksiya işləri gedir. Avqustun əvvəlində başlayacaq təlim-məşq toplanışına hazırlıq gedir. Heç kimə sirr deyil ki, bu il bütün komandalar 1-ci yer uğrunda oynamaq niyyəti ilə işlərini buna uyğun qurmağa çalışacaq. Sponsop dəstəyi olanlar daha üstün vəziyyətdə olacaq. "Zaqatala" zəif büdcəsinə, kasad heyətinə rəğmən, həmişə titullar uğrunda mübarizə aparıb. Bu məqsədimiz dəyişməz qalır".
ABDULLA İSMAYILOĞLU
Digər xəbərlər
