Tur “Bohum”un 2004-dən bəri ilk dəfə “Köln”ü səfərdə məğlub etməsi ilə start götürdü. Maraqlıdı ki, “Bohum” bu mövsüm ilk dəfə penalti qazandı. Komanda bu qələbə sayəsində sonuncu pillədən birbaşa 14-cü pilləyə yüksəldi.

"Football-plus.az" xəbər verir ki, “Bavariya” “qol yağışı”na səhnə olan derbidə, gözlənildiyi kimi, “Auqsburq”u yenərək bu rəqibdən ilk dövrədəki sürpriz məğlubiyyətin qısasını aldı. Həmin oyunda yeganə qolun müəllifi olan Berişa bu dəfə dubl etsə də, onun qəhrəmanlığı xal qazanmaq üçün kifayət etmədi. “Fənərbaxça”nın sabiq forvardı indiyə qədər Münhen nəhənginə qarşı keçirdiyi 4 oyunun hamısında qol vurub! Bu tur əsas diqqətlər bundesliqa çərçivəsindəki 100-cü Rur derbisinə yönəlmişdi. Son 8 turda xal itirməyən “Borussiya” prinsipial rəqibini yenəcəyi təqdirdə tarixində ilk dəfə 9 oyunluq qələbə seriyası yaxalamış olacaqdı. Amma “Şalke-04” son turlardakı yüksəlişinin təsadüf olmadığını göstərdi. Komanda 2 dəfə hesabda geri düşsə də, hesabına 1 xal yazmağı bacardı. Özü də yekun nəticəni bu mövsüm ilk dəfə fərqlənən türkiyəli Kənan Karaman müəyyənləşdirdi. “Şalke-04” derbidə 504 dəqiqəlik qolsuz, 4 oyunluq məğlubiyyət seriyasına son qoydu. Bu nəticədən sonra “arılar” zirvədən 2 xal uzaq düşdülər və “Bavariya” vahid liderə çevrildi. Turun daha bir maraqlı oyununda “Leyptsiq” 2-ci hissədə vurduğu qollarla Münhenqladbax “Borussiya”sını darmadağı edərək 3-cü pilləyə yüksəldi. Çünki “Union” “Volfsburq” səfərində qələbə hesabını qoruya bilməyərək heç-heçə ilə kifayətləndi. “Bayer-04” Bremendə qalib gəlməklə “Vezerştadion”da keçirdiyi ardıcıl 5-ci oyunda da uduzmadı. “Hoffenhaym”ın sürətli enişi davam edir. Komandada nə baş verdiyini anlamaq olmur. “Kəndçilər” “Frayburq” səfərində son anda buraxdıqları qolla məğlub oldular. Türkiyəli Ozan Kabak da qoldan bir neçə dəqiqə öncə qırmızı vərəqə almaqla komandasını çətin duruma saldı. Bundesliqada məğlubiyyət seriyası 7, qələbəsiz seriyası 14 oyuna yüksələn və hər iki gösətricidə antirekordunu yeniləyən “Hoffenhaym” sonuncu pilləyə yuvarlandı! “Frayburq” isə əksinə, çempionat çərçivəsində evdəki məğlubiyyətsiz seriyanı 11 oyuna çatdırmaqla şəxsi rekordunu yenilədi.

• Turun rəqəmi
74 – Leyptsiqdəki görüş Münhenqladbax “Borussiya”sı üçün hər mənada uğursuz alındı. Darmadağın olmaqla yanaşı, komanda həm də penaltini boşa verdi. 53-cü dəqiqədə Pleanın zərbəsini qapıçı Blasvix dəf etdi. Bununla da “Borussiya” bundesliqada ümumilikdə 74-cü dəfə penaltidən yararlana bilmədi. Bu, turnirin tarixində 2-ci göstəricidi. “Borussiya” bu baxımdan yalnız “Verder”dən (75) geridədi.