Tur “Ayntraxt”ın evdə “Bohum”u yenə bilməməsi ilə start götürdü. Frankfurtluların qələbəsiz seriyası 5 oyuna çatdı.

“Mançester Siti” “Leyptsiq”ə elə bir “şapalaq” vurub ki, Marko Rozenin komandası heç cür özünə gələ bilmir. Özü də “öküzlər” qalib gəlmək bir yana, qol vurmağın da yolunu unudub! Komandanın bu dəfə evdə “Maynts-05” önündə pərən-pərən düşməsi turun ən böyük sürprizi oldu. Halbuki “karnavalçılar”ın buna qədər “Red Bull Arena”da qələbəsi yox udu. Tarixinin ən yaxşı mövsümünü keçirən “Union” “Ştutqart”a hər 3 qolu fasilədən sonra vurdu. Sonuncu pillədən qalxmaq fikri olmayan şvabiyalıların bundesliqa çərçivəsində səfərdə qələbəsiz seriyası 23 oyuna çatdı! “Herta” gözlənilmədən Frayburq səfərindən xalla qayıtdı. Bununla da paytaxt təmsilçisi öz antirekorduna - səfərdəki 8 oyunluq məğlubiyyət seriyasına son qoydu. “Şalke-04”ün məğlubiyyətsiz seriyası isə “Bayer-04” ilə qarşılaşmada bitdi. Helzenkirhen təmsilçisi ilk dövrəni sonuncu pillədə başa vurub ikinci dövrənin ilk 8 oyununda uduzmayan birinci komanda kimi turnirin tarixinə düşmüşdü. Amma bu dəfə evdə leverkuzenlilərə müqavimət göstərmək mümkün olmadı. Maraqlıdı ki, Xabi Alonso “Bayer-04”ün başına keçərkən bu iki komanda arasında yalnız 1 xallıq fərq var idisə, hazırda “aspirinlər” helzenkirhenlilərdən 19 xal öndədi!

Nəinki turun, bəlkə də mövsümün həlledici oyunu “Alyans Arena”da baş tutdu. Həftəyə lider kimi daxil olan və son 11 turda uduzmayan “Borussiya”nın bu dəfə “Bavariya”ya layiqincə müqavimət göstərəcəyi ilə bağlı proqnozlar yenə doğrulmadı. Hər şey 18-ci dəqiqədə qapıçı Kobelin kobud səhvi ilə başladı. Qonaqlar o qədər həvəsdən düşdülər ki, qısa müddət ərzində daha iki top buraxdılar. 2-ci hissədə 4-cü qolu da vuran Münhen nəhəngi bundan sonra bir qədər sakitləşdi. “Borussiya” bundan faydalanaraq ən azı böyükhesablı məğlubiyyətdən qurtulsa da, bu, fanatlar üçün təsəllidən başqa bir şey olmadı. “Bavariya” Tomas Tuxelin debüt oyununda çox mühüm qələbə qazanaraq 1 turluq fasilədən sonra liderliyi özünə qaytardı. Yeri gəlmişkən, Tuxelin çalışdırdığı komanda bundesliqada evdə ardıcıl 35-ci oyunda məğlub olmadı (28 qələbə, 7 heç-heçə)! Çünki “Borussiya” onun 2 mövsümlük (2015/16, 2016/17) dönəmində çempionat çərçivəsində evdə uduzmamışdı.

Turun rəqəmi

9 – “Borussiya” ilə “Alyans Arena”da nə baş verir? Almaniyada hamı bu suala cavab axtarmağa çalışır. Dortmund təmsilçisi hansı formada və turnir cədvəlində neçənci pillədə olmasından asılı olmayaraq, sanki əzəli rəqiblə səfər oyununda həvəskar kollektivə çevrilir. Özü də əksər matçlarda intriqa artıq ilk hissədən sonra ölür. 2018/19-da da belə vəziyyət yaranmışdı. “Borussiya” 28-ci tura 2 xal öndə olmaqla lider kimi daxil olsa da, “Alyans Arena”da ilk hissədə 4 top buraxıb və yekunda 0:5 hesabı ilə uduzub pərən-pərən düşmüşdü. “Bavariya” bundesliqada “arılar”ı evdə ardıcıl 9-cu oyunda məğlub etdi! Özü də “rekordmayster” bu 9 qarşılaşmada 37 qol vurub ki, bu da hər oyuna orta hesabla 4-dən artıq qol deməkdi! Maraqlıdı ki, “Bavariya”nın bu mövsüm bundesliqada oynayan başqa klublardan heç birinə qarşı evdə belə qələbə seriyası yoxdu.

Turun ulduzu

Tomas Müller (Bavariya) – son illərdə qollardan daha çox məhsuldar ötürmələri ilə diqqət mərkəzinə düşən veteran gözlənilımədən “Der Klassiker”ə damğa vurdu. O, 5 dəqiqə ərzində dubl edərək qonaqların bütün ümidlərini “dəfn etdi”. Tomas “Der Klassiker”də 3-cü dəfə dubl etdi. Bu duelin tarixində yalnız Levandovski (8) və Herd Müller (4) ondan daha çox dubl edib. Ümumilikdə 33 yaşlı futbolçu bundesliqada 25-ci dəfə bir oyunda ən azı 2 top vurdu.