Tur həm qeyri-adi nəticələr, həm də bərabərliklər ilə zəngin oldu.

“Football-plus.az” xəbər verir ki, 9 qarşılaşmadan altısında qalib müəyyənləşmədi. Aşağı pillələri yaxından maraqlandıran açılış oyununda “Şalke-04” “Herta”nı meydana çıxmağına peşman etdi. Buna qədər 27 turda cəmi 21 qol vuran Helzenkirhen təmsilçisi bu dəfə 5 top vurdu. Komanda elitada sonuncu dəfə 2019-un sentyabrında “Paderborn”la səfər oyununda (5:1) 5 qol vurmuşdu.

Şənbə günü bütün diqqətlər Münhenə və Ştutqarta yönəlmişdi. “Mançester Siti”dən aldığı “qulaqburmasından” sonra “Bavariya”nın necə təsir bağışlayacağı maraq doğururdu. Pavarın erkən qolundan sonra düşünmək olardı ki, “rekormayster” iddiasız “Hoffenhaym”ı darmadağın edəcək. Amma yüksəlişdə olan “kəndçilər” qalan müddətdə nəinki qapını toxunulmaz saxladılar, hətta qol vurmağa da müvəffəq oldular! Kramariç cərimə zərbəsindən fərqlənərək “Alyans Arena”ya toplaşanları şoka saldı. Münhen nəhəngi Tomas Tuxelin başçılığı altında 5-cü rəsmi oyunda 3-cü dəfə qələbəyə həsrət qaldı. Yeri gəlmişkən, Pelleqrino Mataratso inanılmaz bir göstəriciyə imza atdı. O, bundesliqada bir mövsümdə шлш fərqli komanda ilə “Bavariya”ya səfərdə uduzmayan ilk mütəxəssisdi! Amerikalı məşqçi 6-cı turda “Ştutqart”ın başında da Münhendən xalla ayrılmışdı (2:2). Paralel keçən matçda “Borussiya” qalib gəlib “Bavariya” ilə xallarını bərabərləşdirmək əvəzinə “Ştutqart”a uzun müddət hafizələrdən silinməyəcək bir geridönüşə imza atmağa imkan verdi. Bu mövsümdəki 4-cü məşqçinin - Sebastyan Hönessin təyinatından sonra yüksəlişə keçən və ardıcıl 2 qələbə qazanan “Ştutqart” “arılar”a qənim kəsildi. Komanda kiçik möcüzə etdikdən və azlıqda 2 qol vurduqdan sonra 93-cü dəqiqədə Reyna yenidən qonaqları önə keçirdi. Amma meydan sahibləri təslim olmayaraq 97-ci dəqiqədə hesabı 3:3 etdilər! Bu nəticədən sonra zirvədə 2 xallıq fərq dəyişməz qaldı.
3-cü pillədəki “Union” autsayder “Bohum”u yenə bilməyərək liderlərə yaxınlaşmaq fürsətini əldən verdi. Amma ÇL-ə vəsiqə uğrunda mübarizə aparan “Leyptsiq”lə “Frayburq” turu əzmkar qələbə ilə başa vurdu. “Frayburq” bundesliqada 776-cı oyunda vurduğu qolların sayını 1001-ə çatdırdı və turnirin tarixində 1000 qol həddini keçən 21-ci komanda oldu. “Bayer-04”ün 5 oyunluq qələbə seriyası “Volfsburq” səfərində qırıldı. Münhenqladbax “Borussiya”sını yenə bilməyən “Ayntraxt”ın qələbəsiz seriyası isə 7 oyuna çatdı. Frankfurtluları məğlubiyyətdən xilas edən Kolo Muani mövsümdə 13-cü qolunu vurdu. “Ayntraxt”ın heyətində ilk mövsümdə bundesliqada 13 qol həddinə çatan sonuncu futbolçu 1975/76-da Rüdiger Ventsel olmuşdu.

Turun rəqəmi
3 – bu mövsüm sanki bundesliqada futbol möcüzələrinin hamısı “Borussiya”nın başında “çartlayır”. 3-cü turda “arılar” evdə “Verder”lə oyunda 88-ci dəqiqəyə qədər 2 top fərqi ilə öndə ola-ola, 3 top buraxaraq tarixi məğlubiyyətlə üzləşmişdilər. Bu dəfə möcüzəni “Ştutqart” yaratdı. 39-cu dəqiqədən azlıqda oynayan və 78-ci dəqiqəyə 0:2 ilə daxil olam şvabiyalılar əvvəlcə 2 qol vurdular, sonra 1 top buraxdılar və sonda yenə 1 top vurdular. “Ştutqart” sonuncu dəfə bundesliqada azlıqda qala-qala 3 qolu 1980-nin sentyabrında vurmuşdu. Ən maraqlısı odu ki, həmin vaxt da rəqib “Borussiya” idi və yenə də 3:3 hesabı qeydə alınmışdı!

Turun ulduzu
Timo Verner (Leyptsiq) – potensialını heç cür tam aça bilməyən və məhsuldarlığı istənilən səviyyədə olmayan futbolçu dublla komandasının “ÇL zonası”ndakı yerini qorumasında mühüm rol oynadı. Yeri gəlmişkən, hələ fasiləyə qədər 2 dəfə fərqlənməklə 27 yaşlı futbolçu karyerasında mühüm göstəriciyə nail oldu. Verner 244-cü bundesliqa oyununda vurduğu qolların sayını 100-ə çatdırdı (76 məhsuldar ötürmə). Buna qədər o, bundesliqada yalnız bir dəfə fasiləyə qədər dubl etmişdi.