"Trabzonspor” yanvarın sonlarında ayrılaraq “Malmö”yə yollanan sağ müdafiəçi Yans Strüger Larsenin boşluğunu ulduz futbolçu ilə doldurub.

“Football-plus.az” xəbər verir ki, söhbət Toma Menyedən gedir. Son illərdə Dortmund “Borussiya”sındakı çıxışı ilə tanınan Belçika yığmasının üzvü ilə ilyarımlıq müqavilə imzalanıb. 32 yaşlı futbolçu öz cibindən “Borussiya”ya təzminat ödəyərək azad agent statusunda Trabzon təmsilçisinə transfer olunub. Menyeyə bu mövsümün qalan hissəsi üçün 850 min avro, gələn mövsüm isə 1,5 milyon avro məvacib ödəniləcək. Bundan başqa, o, 500 min avroluq imza parası da qazanacaq. Daha öncə “Brügge” və PSJ-də forma geymiş Menye 2020-dən etibarən “Borussiya”nın şərəfini qoruyurdu. Cari mövsümdə yaınız 8 oyuna çıxan bu futbolçunun transferində hazırda “Borussiya”nın məşqçilər korpusunda çalışan Nuri Şahinin də əməyi var.