''Trabzonspor'' Belçika yığmasının üzvünü transfer etdi - FOTO
Son 4 turda məğlub olmaqla fanatların şok yaşadan və 2015-ci ildən bu yana ən uğursuz seriyasına imza atan ''Trabzonspor'' heyətini önəmli futbolçu ilə gücləndirib.
Qaradənizlilər Dortmund ''Borussiya''sından Toma Menyeni transfer ediblər. İlkin anlaşma əldə olunan təcrübəli cinah müdafiəçisi dünən axşam saatlarında xüsusi təyyarə ilə Trabzona gəlib. Hava limanında ilk açıqlamalarını verən futbolçu bunları deyib:
''Baş məşqçi ilə görüntülü söhbət etdim. Komandaya liderlik edə biləcək təcrübəli bir futbolçuya ehtiyacının olduğunu söylədi. Klubun və məşqçimizin mənə anlatdığı layihə xoşuma gəldi. Ona görə də çox düşünməyimə ehtiyac qalmadı. Burda olanlardan Densvili yaxından tanıyıram. Daha öncə birlikdə oynamışıq. Türkiyə çempionatı da yaxından təqib etdiyim liqalardan biridi. ''Trabzonspor''un daim iddialı olduğunu, 2 il öncə çempion olmağı bacardığını bilirəm. İstanbul nəhənglərinə qarşı mübarizəmizi davam etdirəcəyik''.
''Borussiya''da əsas heyət üzvü sayılmayan Menye AÇ-2024-də Belçikanın heyətində yer almaq üçün daimi oynaya biləcəyi bir kluba keçməyə can atırdı. O, Nuri Şahinin də məsləhəti ilə ''Trabzonspor''u seçdi. Şahin bilindiyi kimi dekabrdan etibarən ''Borussiya''da köməkçi-məşqçi kimi çalışır. 32 yaşlı futbolçunun öz cibindən pul ödəyərək ''Borussiya''dan ayrılacağı və azad agent statusunda ''Trabzonspor''la ilyarımlıq müqavilə imzalayacağı gözlənilir.
Belçika təmsilçisi ''Virton''un yetirməsi olan, peşəkar karyerasına bu klubda başlayan, daha sonra ''Brügge'' və PSJ-də top qovan Menye 2020-ci ildən ''Borussiya''da idi. O, cari mövsüm cəmi 8 rəsmi oyuna çıxıb. 2013-cü ildən bu yana şərəfini qoruduğu Belçika yığmasında isə indiyə qədər 62 oyun keçirib və 8 qol vurub.
ƏLİ
Digər xəbərlər
