Buna qədər “Adana Dəmirspor”dan Yonas Svenssonu heyətinə qatan “Beşiktaş” daha 3 futbolçunun transferini tamamlayıb.

“Football-plus.az” xəbər verir ki, İstanbul nəhəngi “Nottingem Forest”dən mərkəz müdafiəçisi Co Uorrallı mövsümün sonuna qədər icarəyə götürübsə, “Legiya”nın albaniyalı yarımmüdafiəçisi Ernest Muçi ilə 3,5 illik müqavilə imzalayıb. 27 yaşlı Uorralla görə icarə haqqı ödənilməyəcək. 193 sm boya malik futbolçu mövsümün sonuna qədər 600 min avro məvacib qazanacaq. Albaniyalı futbolunun yeni ulduzu sayılan Muçi isə “Qartal”a bonuslarla birlikdə 8 milyon avroya başa gələcək. 22 yaşlı futbolçu bu mövsüm “Legiya”nın heyətində 34 rəsmi oyunda 9 qol, 2 məhsuldar ötürməlik performans sərgiləyib. Bu arada “ağ-qaralar” dünən axşam saatlarında daha bir futbolçunun – “Braqa”lı Əli Məhəmməd Əl-Musratinin keçidini həll edib. 27 yaşlı liviyalı yarımmüdafiəçi həm hücumameyilli, həm də müdafiəyəmeyilli oynamağı bacarır. Bu mövsüm “Braqa”nın heyətində 20 rəsmi oyunda 4 qol, 1 məhsuldar ötürmə ilə yadda qalan Əl-Musrati mövsümün sonuna qədər icarəyə götürülüb. “Beşiktaş” onu daimi əsasda transfer etmək hüququnu da ələ keçirib.