“Razılaşaq ki, limit məsələsi olana qədər belə, yerli futbolçu çatışmazlığı var. Bunun da başlıca səbəbi futbol akademiyalarının sayının yetərincə olmamasıdı. Ancaq bir də başqa tərəfdən baxaq. Maliyyə cəhətdən yüksək olan, böyük məbləğdə legioner transfer edən bir-iki klubu çıxsaq, qalan legionerlərin qiyməti aşağı-yuxarı yerli futbolçuların qiymətiylə bərabərdi. Həqiqətən yerli futbolçuların keyfiyyəti olacaqsa, klubları qane edəcəksə, təbii ki, onlar yerli oyunçuları oynadacaq. “8+3” olması o demək deyil ki, mütləq üç yerli oyunçu oynamalıdı. Gördüyünüz kimi, elə komandalarımız var ki, yerli oyunçu limitinin 4 olmasına rəğmən, 5-6 yerli ilə oynayır. Yəni dörd yerli futbolçu oynadan komandaların sayı azdı. Bu məhdudiyyət nəticəsində oyunçular öz üzərində daha çox işləyib, bir-biri ilə rəqabət aparacaq ki, ölkəyə gətirilən legionerlərdən üstün olduqlarını göstərsinlər. Əsas səbəb futbolçu yetişməməsidi. Bu gün aşağı liqa klublarını demirəm, premyer-liqa klubları belə meydança problemiylə üzləşir. Belə problemlər bir kənarda qalıb, biz isə futbolçu qıtlığına, milli komandanın formalaşmamasına əsas səbəb kimi legioner limitini göstəririk. Neçə ildi limit “7+4”dü. Onda problem yaşamırdıq? Əlbəttə, yaşayırdıq. Məsələn, neçə il U-21 üçün limit tətbiq olundu. Hansı 21 yaşa qədər futbolçumuz parladı, xaricə getdi və ya dəhşətli inkişafa nail oldu? Yəni bu təcrübə 21 yaşa qədər olan yerli oyunçularla bağlı özünü doğrultmadı. İndi “8+3” variantının təsdiq olunması və ya olunmaması yerli futbolumuzun inkişafını şərtləndirən əsas səbəb deyil. Onsuz da komandalar yerli oyunçu baxımından yetərincə problem yaşayır. İndi məsələyə başqa rakursdan baxaq. Yerli oyunçuların keyfiyyəti istənilən səviyyədə olmasın, amma limit var deyə oynasınlar. Bu da düzgün deyil. Çünki onların arxayınlaşmasına, məsuliyyətli olmamasına, rəqabət aparmamasına gətirib çıxaracaq. Ona görə də limitin ölkə futbolunun inkişafına mane olan əsas problem olduğunu düşünmürəm”.