Ötən həftənin əsas mövzularından biri Klublar Komitəsinin iclası idi.

Qurumun toplantısında AFFA-nın baş katibi Sərxan Hacıyev, PFL nümayəndələri Elgiz Abbasovla Aslan Şahgəldiyev və premyer-liqa təmsilçilərinin rəsmiləri iştirak etdi. İclasdan sonra, demək olar ki, bütün klubların nümayəndələri yerli mediaya açıqlama verdi. Gündəmdə əvəzetmə sayının və limitin dəyişdirilməsi olub. Bu məsələlər AFFA İcraiyyə Komitəsinin növbəti iclasında müzakirəyə çıxarılacaq.

Bir çox klub rəsmiləri, əsasən də Rəşad Sadıqovla Samir Abasov limitin ləğv olunmasını istəyir. “Zirə”nin çalışdırıcısı “Neftçi” ilə matçdan sonra 21 yaşadək futbolçunun məcburən start heyətində meydana çıxmasını qeyri-peşəkarlıq adlandırdı. Hamıya bəllidi ki, bu qayda gənc oyunçuların inkişafı üçün nəzərdə tutulub. Əsas məqsəd 21 yaşadək futbolçulardan ibarət yığmanın üzvlərinin oyun praktikasını artırmaqdı. Amma klubların çalışdırıcıları bunu istəmir. Görəsən, bu yaş qrupu üzrə yığmanın baş məşqçisi Milan Obradoviç bu haqda nə düşünür? Baş məşqçilərin bu istəyinə münasibətini öyrənmək üçün serbiyalı çalışdırıcı ilə əlaqə saxladıq. Obradoviçin məsələ ilə bağlı fikirləri belə oldu:

“Klublar Komitəsinin iclasından xəbərdaram. Yerli media vasitəsi ilə klub nümayəndələrinin fikirlərini öyrənirəm. Bəzi klublar legionerlərin sayının artırılmasını istəyir, bəziləri, ümumiyyətlə, ləğv olunmasını tələb edir. Amma bunların heç biri mənim üçün maraqlı deyil. Hər il bu barədə danışırıq. AFFA rəhbərliyi həmişə klublarla müzakirələr aparır. Bu, yaxşıdı. Müzakirə olan yerdə inkişaf olur. Bunların hamısı Azərbaycan futbolunun gələcəyi üçündü. Təbii ki, bəziləri çempionatın səviyyəsinin yüksəlməsini istəyir. Bu səbəbdən də legionerlərin sayının artırılmasını tələb edirlər. Təbii ki, bu, klubların avrokuboklarda daha yaxşı mübarizə aparmasına səbəb olacaq. Belədə yerli futbolçular daha çox çalışmalı olacaq ki, əsas heyətə düşsünlər. Bu, sadəcə, əsas yığma üçün yaxşı olacaq. Mən də istəyirəm ki, tezliklə bu məsələ həllini tapsın. Azərbaycan futbolu üçün ən yaxşı variant nədisə, onu da etsinlər. Bunun yaxşı və ya pis olduğunu deyə bilmərəm. Ən azı bir və ya iki il lazımdı ki, nəticəni görək. Ümid edirəm ki, bütün klublar sözü bir yerə qoyub ölkə futbolu üçün ən yaxşı qərarın tətbiqini istəyəcəklər. Yenə deyirəm, bu, sadəcə, çempionatda çıxış edən komandaların səviyyəsini artıracaq. Hadisələrin necə cərəyan edəcəyini zaman göstərəcək. Yekun qərar necə olacaqsa, ona uyğun da iş görəcəyik. Ümid edirəm ki, ölkə futbolunun gələcəyinə pis təsir edən qərar verilməyəcək”.
[quote][/quote]
İLKİN SULTANLI