“Ümumiyyətlə, legioner limitinin artırılması ideyasını ortaya atanlar bunun sonunun necə olacağını heç fikirləşirlərmi? Doğrusu, mən də bir neçə il əvvələ qədər legioner limitinin götürülməsi fikrindəydim. Ancaq bu, o zamanın tələbi idi. Çünki ölkədə futbol ierarxiyası yox idi, yerli futbolçuların üzə çıxması ehtimalı az idi. Ona görə də məcbur idik ki, Azərbaycan çempionatının səviyyəsinin artırılması barədə fikirləşək. Amma son bir-iki il ərzində vəziyyət dəyişib. Premyer-liqa, əvəzedicilər liqası, 1-ci liqa, 2-ci liqa, əlavə Region Liqası da var. Bu liqalarda çoxlu yerli oyunçu, onların özlərini göstərə bilməsi üçün də müəyyən şərait var. Yəni indi çempionatın səviyyəsini qaldırmaq üçün necə gəldi legioner oyunçu transfer etmək lazım deyil. Doğrudu, legionerlərin gəlişi çempionatın səviyyəsini müəyyən qədər artırıb. Amma etiraf edək ki, bu, kifayət deyil. Çempionatın səviyyəsinin artırılması üçün öncə Azərbaycan futbolunun özünü cəlbedici etmək lazımdı. Yəni oyun keçirilən stadionlar, klubların bazaları, tribunada azarkeşlərin olması, teleyayınln keyfiyyəti və s. məsələlər bura daxildi. Bu problemlərin hamısı aradan qaldırılandan sonra gözəlliyin arxasına düşə bilərik. “Top-5” ölkə klublarından oyunçu gətirə bilməyəcəyiksə, ordan-burdan başqa legionerlər gətirməyə ehtiyac yoxdu. İndiki zamanda Azərbaycan futbolunun problemi legioner limiti deyil. Onsuz da ölkəyə gələn legionerlərin səviyyəsini görürük. Legioner limitinin müzakirə edilməsi belə ölkə futboluna ziyandı. Başqa şeyləri müzakirə etmək lazımdı. Bu gün “7+4” ən yaxşı variantdı və düşünürəm ki, ən azı qarşıdakı iki ildə bu limitə dəyməməlidilər”.