“Əvvəlcə onu qeyd edim ki, hazırda futbolumuzda yerli futbolçu kasadlığı olduğundan bütün klublar transfer çalışmalarını onların üzərində qurur. Baxanda görürük ki, hansısa klub bir yerli oyunçunun yanında 3-4 legioner futbolçu da transfer edir. Lakin bu, klubun xarici futbolçulara üstünlük verməsi anlamına gəlmir, sadəcə, yerli oyunçuların kasadlığına görədi. Məsələn, “Zirə” Ceyhun Nuriyevlə razılaşdı, “Qarabağ” Aleksey İsayevi “Sabah”dan almağa çalışır, “Səbail”ə lazım olmayan Amil Yunanov “Kəpəz”ə lazım oldu, bir az geriyə baxsaq, Qara Qarayev “Qarabağ”dan ayrılan kimi “Neftçi”ylə müqavilə imzaladı. Bu baxımdan yerli futbolçulara ciddi tələbat var.

Təəssüf ki, bu, yerli oyunçuların səviyyəsindən yox, sadəcə, keyfiyyətli yerli futbolçuların azlığından irəli gəlir. Buna görə də klublar ilk növbədə yerli oyunçuları cəlb etməyə çalışacaq, sonra isə transferlər legioner futbolçular üzərində qurulacaq. Ancaq bir məsələni də nəzərə almaq lazımdı ki, yayda klublar bir neçə transferlər etdi və demək olar ki, əksəriyyətində legioner limiti dolub. Bundan sonra götürüləcək əcnəbi oyunçuya görə böyük rüsum ödənilməlidi. Bu da öz növbəsində bəzi klubların əl-qolunu bağlayacaq. Bu baxımdan qarşıdakı “transfer pəncərəsi”nin çox hərəkətli olacağına inanmıram.

Ola bilər ki, məsələn, “Neftçi” yeni məşqçinin istəyini nəzərə alıb 3-4 futbolçu transfer etsin. Əksər klublar 1-2 əcnəbi oyunçu transfer edə bilər və imkan daxilində yerli futbolçularla heyətlərini gücləndirməyə çalışacaq. Lakin bu daha çətin görünür. Birinci halda rüsum mane olur, ikinci halda isə dırnaqarası desək, “bazarda mal yoxdu”. Xaricə gedə biləcək yerli futbolçular barədə dəqiq nəsə demək çətindi. Çünki keyfiyyətli yerli futbolçu azdı. Hələ bir baxaq görək Avropada olan oyunçularımız orda qala bilirmi? İndi ora getmək çətindi. Keyfiyyətli adlandırdığımız futbolçuların hamısının müqaviləsi var. Heç bir komanda keyfiyyətli yerli futbolçusunu onun yerinə birini tapmamış göndərməz. Buna görə də xaricə təsadüfi bir transfer olacaqsa, bunu bilmərəm. Ancaq belə gözləntim yoxdu”.