Türkiyə Futbol Federasiyası ilə Klublar Birliyi arasında dünən növbəti görüş baş tutub. Bu dəfəki görüşün əsas mövzusu legioner limiti olub. ''Sabah'' nəşrinin yazdığına inansaq, ortaq fikir hazırda mövcud olan limitin daha 1 il davam etməsi olub.

"Football-plus.az" xəbər verir ki, bu mövsüm Türkiyə çempionatında ''8+3'' limiti tətbiq olunur. Yəni klublara start heyətində maksimum 8 legioner oynatmağa icazə verilir.

''Qalatasaray'' və ''Qaziantep'' başda olmaqla bəzi klublar limitin yığışdırılmasını tələb edirdilər. Yəni onlar start heyətində 11 futbolçunun hamısının legioner olmasına icazə verilməsini istəyirdilər. Amma ''Fənərbaxça'' və başqa klublar indiki limitin davam etməsinin tərəfdarı idilər.

Elə şaiyələrə inansaq, federasiya prezidenti Mehmet Büyükekşi də limitin tamamilə yığışdırılmasını dəstəkləmirdi. ''8+3'' limitinin davam etməsi ilə bağlı rəsmi qərarın bazar ertəsi və ya çərşənbə axşamı açıqlanacağı gözlənilir.