Oyunda ilk təhlükəli vəziyyəti 2-ci dəqiqədə “hərbçilər” yaratdı. Ramilin hava ötürməsini Sabir başla qapıya göndərdi. Lakin Quqeşaşvili yerində idi.

Fəal oyun sərgiləyən MOİK-in futbolçuları 6-cı dəqiqədə daha bir qol təhlükə yaratmağa nail oldu, ancaq Elvinin uzaqdan zərbəsi qapıdan azca aralı keçdi. 13-cü dəqiqədə “Qarabağ” ilk təhlükəli hücuma çıxdı. Cicanın qapıya zərbəsini Zeynal çətinlik çəkmədən dəf etdi. 24-cü dəqiqədə yenə Cica topu başla qapıya yönəltsə də, qolkiper gözəl seyvlə zərbəni dəf etdi. 27-ci dəqiqədə MOİK əks-hücuma çıxaraq cərimə meydançasına daxil oldu. Qarşılıqlı hücumlar şəraitində davam edən oyunun 30-cu dəqiqəsində Nəriman hesabı açsa da, hakim qolun ofsayddan vurulduğunu dedi. VAR hakimləri də bu qərarı təsdiqlədi.

32-ci dəqiqədə Almeyda Ramillə mübarizədə zədələnərək bir neçə dəqiqə komandasını meydanda azlıqda qoydu. Qurban Qurbanov futbolçunun mübarizəni davam etdirə bilməyəcəyini görərək vaxtından əvvəl oyunçu dəyişikliyinə məcbur oldu. İlk hissəyə artırılan vaxtda Keytanın ötürməsini Cica dəyərləndirə bilmədi.
2-ci hissədə ağdamlılar aşkar üstün təsir bağışladı. 54-cü dəqiqədə cərimə meydançası daxilindən topa zərbə endirən Cica “çərçivə”yə düşə bilmədi. 58-ci dəqiqədə Juninyo rəqiblərindən sıyrlıb topu Cicaya göndərsə də, bu dəfə də top qapıdan aralı keçdi. 70-ci dəqiqədə Yankoviç qapıya zərbə vurmaqla bəxtini sınadı. 4 dəqiqə sonra daha bir təhlükəli vəziyyət yaradıldı. Zeynal vaxtında irəli çıxaraq Juninyonun fərqlənməsinə imkan vermədi.

Ümumiyyətlə, təhlükəli vəziyyətlər sıralanır, “hərbçilər” isə sanki Qarabağı alan gerçək hərbçilərin cəsarətindən ilhamlanaraq qapısını toxunulmaz saxlaya bilirdi. 86-cı dəqiqədə Juninyonun qüvvətli zərbəsi dirəyə tuş gələndən sonra düşünmək olardı ki, bəxt də MOİK-in yanındadı və sensasiyaya ümid etmək olar. Amma yox, əksər hallarda olduğu kimi, yenə də sonda güclü qalib gəldi. Sonuncu uzatma dəqiqəsində Rahilin qapı qarşısına göndərdiyi hava ötürməsini Nəriman başla tora qovuşdurmağa nail oldu. Beləliklə, oyun Qurbanovun yetirmələrinin minimal hesablı qələbəsi ilə bitdi. “Qarabağ” sensasiyaya imkan vermədi.

Gözdən qaçmadı
* Oyundan əvvəl şəhidlərin xatirəsi birdəqiqəlik sükutla yad olundu, Prezident İlham Əliyev hər kəsə “xoş gəlmisiz” dedi və təbrik etdi. Prezident həmçinin bir neçə aydan sonra Ağdamda yeni “İmarət” stadionunun tikintisinə başlanacağını dedi. Topa ilk toxunuş də Əliyevdən gəldi. Həmin top sonradan xüsusi yerə aparıldı.
* Ümumilli lider Heydər Əliyevə həsr olunan videoçarx göstərildi.
* Tribunalarda “Azərbaycan”, “Qarabağ”, “Şəhidlər ölməz, vətən bölünməz” şüarları səngimədi.