Misli premyer-liqasının 20-ci turunda "Araz-Naxçıvan" "Sumqayıt"la qarşılaşıb - 1:1.

"Football-plus.az" xəbər verir ki, matçdan sonra "gənclik şəhəri" təmsilçisinin çalışdırıcısı Samir Abasovun mətbuat konfransı keçirilib. Sizi mütəxəssisin fikirləri ilə tanış edirik:

- Avrokuboklar zonasında qalmaq üçün planınız nədi?
- Bu gün əlimizdə bayraq etməmişik ki, burda qalacağıq. Bizim üçün həddindən artıq çətin olacaq. Özünüz görürsüz ki, oyunlar hansı məcrada keçir. Gərginlik daha da artır. Çalışacağıq ki, realist yanaşaq. Bundan sonra da xallar itiriləcək. Panikaya düşməmək lazımdı. Bu gün olduğumuz yer bizi təzyiq altına salmamalıdı. Məqsədimiz avrokuboklar deyil. Əsas məqsəd komanda qurmaqdı. Boşluqlarımız çoxdu. Oyunumuz əvvəldən axıra kimi eyni tempdə getmir. Bu gün hücum xəttimiz demək olar ki, yox idi. Olduğumuz yerdə qala bilsək, yaxşı olar.

- Qarşıda "Neftçi" ilə oyununuz var. Hücum xətti olmadan çətinlik çəkməyəcəksiz?
- Hücumçumuz yoxdu demədim. Sadəcə bu oyunda hücum xətti yox dərəcəsində idi. Növbəti matçda çalışacağıq ki, vəziyyəti düzəldək.

- Həmin görüşləri kubok və çempionat olaraq böləcəksiz?
- Kubok və ya çempionat oyununu bölə bilmərik. Amma bölməliyik. Düşünürəm ki, kuboku qurban verməliyik. 13-14 nəfərlə iki cəbhədə oynamaq çətindi. Getdikcə güc balansı yüz faiz üzə çıxacaq. 17 gün ərzində eyni oyunçularla 5 oyun oynamaq... Bizim üçün yazılan qanundu. Realist olaq, iki cəbhədə oynamaq çox pis nəticələnə bilər.

- Rövlan Muradovun oyunundan nə dərəcədə razı qaldınız?
- Rövlanın oyunundan razıyam. Uduzmaq istəmirdi. Bu, Rövlanda görünürdü. Canını qoyurdu. "Sumqayıt" kimi komanda üçün Rövlanın etdikləri mənim üçün çox xoşdu.

- Transfer məsələləri ilə bağlı rəhbərliklə aranızda fikir ayrılıqları var?
- Ümumiyyətlə transferdən danışmaq istəmirəm. Olacaqsa, gəlib oynayacaqlar. Dəfələrlə demişəm ki, transfer lazımdı.

- Son açıqlamanıza görə danışmaq istəmirsiz?
- Xeyr, ümumiyyətlə danışmaq istəmirəm.