Qış fasiləsindən sonra keçirilən ilk turun son oyununda iki iddialı komanda üz-üzə gəldi.

Matç hər iki tərəf üçün xüsusi əhəmiyyət kəsb edirdi. Bilindiyi kimi, “Qarabağ” Avropa Liqasının pley-offunda “Braqa” ilə qarşılaşacaq. Belədə fevralın 15-nə qədər keçiriləcək görüşlər müəyyən mənada həm də portəgizlərlə duellərə hazırlıq xarakteri daşıyır. Yəni” “köhlən atlar” ehtiyatlı və səmərəli oyunla yanaşı, yaxşı nəticə də qazanmalıydı. “Sabah”dan alınan Aleksey İsayevin start heyətində yer aldığı matçda əsas hədəf liderliyi möhkəmlətmək idi. “Araz-Naxçıvan” isə çətin sınaq qarşısındaydı. Konfrans Liqasına vəsiqəyə can atdığını gizlətməyən naxçıvanlılar üçün ağdamlılarla səfər matçında 1 xal belə qənimət sayılacaqdı.

Matç Qurban Qurbanovun komandasının təzyiqiylə başladı. “Köhlən atlar” ilk dəqiqələrdən rəqibi meydanın özünə adi hissəsinə sıxışdırmağa çalışır, irəlidə fəallıq göstərirdi. Çox keçmədən ev sahiblərinin üstünlüyü fayda verdi. 5-ci dəqiqədə Benzya və Juninyonun ötürmələriylə qapı önünə gətirilən topa sonda Andrade zərbə vurdu. Burda Kurdiç “qaş düzəltmək əvəzinə gözü də çıxardı”. Daha dəqiqi, təhlükəni sovuşdurmaq istəyərkən həm Avramı çaşdırdı, həm də cari mövsümdə 2-ci dəfə avtoqol müəllifi oldu. “Araz-Naxçıvan”a toparlanmaq üçün bir neçə dəqiqə lazım gəldi. Bu ərəfədə komandalar sürəti azaltmasa da, qol vəziyyətləri qeydə alınmadı. Qonaqlar 17-ci dəqiqədə özünü göstərdi. Vadim Turanın künc zərbəsindən göndərdiyi topu Kadiriyə ötürsə də, qanalı yarımmüdafiəçi “çərçivə”ni dəqiq nişan ala bilmədi. “Qırmızı-ağlar”ın yaşatdığı təhlükədən sonra Zubirin öyrəşdiyimiz təkbaşına nəsə etmək istəyinə şahidlik etdik. Onun zərbəsini 19-cu dəqiqədə Avram dəf etsə də, 22-ci dəqiqədə məqsədinə nail oldu. Fransalı yarımmüdafiəçi Silvanın ötürdüyü topu başla qapı toruna qovuşdurmaqla fərqi artırdı. Əslində “köhlən atlar”ın aşkar üstünlüyü haqda danışmaq doğru olmaz. Qonaqlar da arabir təhlükəli vəziyyət yaradırdı. İlk hissənin sonuna yaxın Manafov və Kuzmanoviç qapıya zərbə ilə yadda qaldı.

İkinci yarı “Araz-Naxçıvan”ın oyuna nəzarəti ələ keçirmək cəhdlərinin fonunda start götürdü. Rodrigesin sol ayaqla uzaqdan zərbəsi işə yaramadıqdan sonra bu aqibəti Juninyo da yaşadı. Çempionatın bombardiri Avramı məğlub edə bilmədi. Qapıçı topu məharətlə onun ayaqlarından xilas etdi. 61-ci dəqiqədə Zubir dublunu rəsmiləşdirdi. O, bir neçə müdafiəçidən sıyrılaraq ötürmə verən Elvinin əziyyətini puç etmədi. Yeri gəlmişkən, bu hücumun əsasını gözəl ara ötürməsi ilə İsayev qoymuşdu. Vəziyyətin qəlizləşdiyini görən Azər Bağırov Maşike ilə Kuzmanoviçi Orxan və Nicatla əvəzlədi. Bu ərəfədə “Qarabağ” rəqibini sıxışdırmağa davam edirdi. Amma Andrade dördüncü qol axtarışına fayda verə bilmədi. Avram irəli atılaraq topa yiyələndi. 71-ci dəqiqədə Kadiri qarşısıalınmaz zərbəylə fərqi azaltmağı bacardı. Orxanın müdafiə xəttini yara bilməyəcəyini anlayıb geriyə ötürmə verməsindən yararlanan futbolçu möhtəşəm qola imza atdı. İrəliləyən dəqiqələrdə İldar Alekperovla Ramin Nəsirli “Araz-Naxçıvan”ın heyətində debüt etdi. 85-ci dəqiqədə Orxan, demək olar ki, yüzfaizlik qol şansından istifadə edə bilmədi. Daha doğrusu, Lunyov ona ustalıqla mane oldu. Matçın son dəqiqələrində Avram Cica və Toralın zərbələrini zərərsizləşdirməli oldu. Beləliklə, “Qarabağ” növbəti qələbəsini qazanaraq ən yaxın izləyicisi “Zirə”dən 14 xal uzaqlaşdı. “Araz-Naxçıvan” isə mövsümün ikinci yarısına uğursuz başladı.

Gözdən qaçmadı
* Oyunu izləyənlər arasında Naxçıvan təmsilçisinin sabiq mətbuat katibi Tahir Tahiroviç də var idi.
* “Qarabağ Ordu” fanklubu çempionluq nəğməsi oxuyurdu.
* “Qarabağ” azarkeşləri oyunun sonluğunda Azər Bağırovun ünvanına “Azər, get evə” şüarını səsləndirdi.
* Qonaqların qolkiperi Avram matçdan sonra paltardəyişmə otağına gedərkən xeyli əsəbiydi. O, komanda yoldaşlarına “düzgün oynamırsız, vuruşmaq lazımdı” tipli sözlər deyirdi.

KƏNAN BAHADIR