Dünən sensasiya ilə nəticələnən "Araz-Naxçıvan" - "Qarabağ" oyununu izləyənlər arasında menecerlərdən Səbuhi Səfiyarlı da var idi.
O, oyunla bağlı fikirlərini “Football-plus.az” saytı ilə bölüşdü.
- Səbuhi bəy, oyunla bağlı fikirləriniz maraqlıdı...
- Sönük oyun oldu. Əslində "Bayer-04"ə ağır məğlubiyyətdən sonra "Qarabağ"dan motivasiyasız matç gözlənilən idi. Amma Ağdam təmsilçisinin məğlub olacağını düşünmürdüm. Komanda hesabda geri düşəndən sonra da fəallıq göstərə bilmədi. Amma "Araz-Naxçıvan" təmkinlə, ağılla çıxış edərək ona lazım olan qələbəni qazandı
- "Araz-Naxçıvan" çempionatımıza rəng qatıbmı?
- Birmənalı şəkildə bəli. Həm oyun tərzi, həm də baş məqçiləri ilə naxçıvanlılar diqqət cəlb etməyi bacarıblar.
- Bəs Muxtar Respublika təmsilçisi ilk "4-lüy"ə düşə biləcəkmi?
- Sona qədər bu tempi saxlasalar, uğur qazana bilərlər. İndidən qəti fikir bildirmək çətindi. Çünki hər komanda yüksəliş tempini sona qədər qoruya bilmir. Çempionatımızda dəfələrlə olub ki, ilk dövrəni hansısa komanda üstün keçirib, amma sonrakı dövrələrdə tənəzzül yaşayıb. Amma Azər Bağırovun yetirmələrinin ilk "5-lik"də yer alacağına daha çox inanıram
- Bu iki komandaya yeni nəfəs lazımdımı?
- "Araz-Naxçıvan"da hazırda vəziyyət pis deyil, işləri də yaxşı gedir. Ona görə inanmıram ki, onlar yeni transferə ehtiyac duysunlar. Bəlkə hücum xəttinə bir oyuncu cəlb edə bilərlər. Amma belə ehtiyacları yoxdu. "Qarabağ"ın ötən mövsümlə müqayisədə zəiflədiyi hiss olunur. Ötən mövsüm "köhlən atlar"ın 2-ci heyəti əsas "11-lik"dən fərqlənmirdisə və rəqiblərini üstələyirdisə, hazrda 2-ci heyət arzuolunan səviyyədə deyil. Həmçinin heyətdə zədəlilər də var. Veşoviçi iki aydan sonra bu gün ilk dəfə meydanda gördük. Amma inanmıram ki, "Qarabağ" qışa kimi transfer etsin. Etsə də, bununla ciddi nəsə dəyişsin. Zənnimcə, Ağdam təmsilçisində yanaşmada dəyişiklik olsa, daha faydalı olar.
ABDULLA İSMAYILOĞLU