Fevralın 15-də Avropa Liqasının pley-offunda “Qarabağ”ı qəbul edəcək “Braqa”nın ən təhlükəli oyunçusu Simon Banzadı. 14 qolla bombardirlər siyahısına başçılıq edən hücumçunun ikili vətəndaşlığı var. O, cibində həm Fransanın, həm də Konqo DR-in vətəndaşlığı daşıyır.

“Football-plus.az” xəbər verir ki, Banza artıq qitənin nəhəng klublarının da diqqət mərkəzindədi. Bu üzdən adını “Braqa”nın son üç oyundakı heyətində görməyəndə düşündük ki, yəqin qış “transfer pəncərəsi”ndə başqa kluba satılıb. Belə deyilmiş, sadəcə, Simon yığmanın heyətində Afrika Millətlər Kubokuna qatılıb. Konqo DR yığması qrupda keçirdiyi hər iki oyunda 1:1 hesablı heç-heçə ilə kifayətlənib.

Banza bu oyunların birincisində (Zambiya) 82 dəqiqə oynayıb, ikincisində isə şans qazanmayıb. Konqo DR iki oyundan sonra 2 xalla 2-3-cü yerləri bölüşür.