''Trabzonspor''da iki futbolçu ilə bağlı şok qərar
Bazar günü Türkiyə çempionatında öz meydanında ''Qalatasaray''ı qəbul edəcək ''Trabzonspor''da heyətlə bağlı diqqətçəkən qərar qəbul edilib.
Belə ki, rəhbərliyin qərarı ilə iki futbolçu - Abdülkadir Ömür və Umut Bozok əsas komandadan kənarlaşdırılıb! Onlar yeni bir qərara qədər fərdi şəkildə məşq etməli olacaqlar. Bundan başqa bu futbolçuların komanda daxilində davranışları ilə bağlı də araşdırma aparılır. Baş məşqçi Abdulla Avcı ən son cümə axşamı kubokda ''Manisa'' üzərində qazanılan qələbənin ardından ''Abdülkadir ilə Umut neçə müddətdi ki, ortalıqda yoxdu. Bu gün də bizə kömək etmədilər. Səbəbini özüm də bilmirəm. Onlarla bağlı açıqlamanı rəhbərlik verəcək'' ifadələrini işlətmişdi.
Bu arada Umut Bozokun meneceri Olivye Davo Avcının cavabını bu sözlərlə verib:
''Byelitsa ayrıldıqdan bu yana Umut oynamır. Noyabrın əvvəllərində zədə almışdı. 2 həftəyə sağalaraq komandaya geri dönsə də, dekabrda yenidən ağrıları artmışdı. Yeni il tətilində müayinə üçün Fransadakı həkiminin yanına getdi. Bir neçə gün öncə də geri dönərək komanda ilə birlikdə məşqlərə başlamışdı. Avcının açıqlamasını anlamadım. Çünki klubda hər kəs həqiqətləri bilir. Səbəbsiz yerə komandadan kənarlaşdırılması çox qəribədi''.
Qeyd edək ki, ''Trabzonspor''un öz yetirməsi olan Ömür indiyə qədər bu klubda 211 rəsmi oyunda 25 qol, 36 məhsuldar ötürmə ilə fərqlənib. Daha öncə Türkiyədə icarə əsasında ''Kasımpaşa''nın şərəfini qoruyan Umut Bozok isə 2022-nin yayında 2 milyon avroya ''Loryan''dan transfer edilib. 27 yaşlı forvard ötən mövsüm 41 rəsmi oyunda 10 qol, 3 məhsuldar ötürməlik performans sərgiləmişdi. Bu mövsüm isə Bozok cəmi 4 rəsmi oyuna çıxıb və qol vurmayıb.
ƏLİ
Digər xəbərlər
