Son günlər transfer bazarında xeyli fəallaşan ''Trabzonspor'' heyətini gücləndirməkdə davam edir.

Football-plus.az xəbər verir ki, qaradənizlilərin ən son Naci Ünüvar ilə Umut Bozoku heyətinə qatdığını xəbər vermişdik. Son çempion əsas ''bomba''nı srağagün partlatdı. Söhbət Maksi Qomesdən gedir. 2019-dan bəri ''Valensiya''nın şərəfini qoruyan 26 yaşlı forvard əslində ''Fənərbaxça''ya keçidin biraddımlığında idi. İstanbul nəhəngi həm onunla, həm də klubu ilə ilkin razılıq əldə etmişdi. Amma çərşənbə günü qəribə hadisələr baş verdi. ''Fənər'' rəhbərliyi bir andaca fikrini dəyişərək Qomesin komandaya faydalı ola biləcəyinə şübhə etməyə başladı. Bunun üçün futbolçuya daimi əsasda yox, icarə əsasında transfer təklif olundu. Bu isə Qomesi qane etmədi. Oyunçunun meneceri ''Trabzonspor''la əlaqə saxlayınca, hadisələrin belə axarı trabzonlular üçün göydəndüşmə oldu. Çünki əsas qol silahı Korneliusu əldən verən komanda təcili mərkəz hücumçusu axtarışında idi. Rəhbərlik qısa müddətdə həm futbolçunun özü, həm də klubu ilə anlaşma əldə edincə Qomes Türkiyəyə gəldi. Transferin detallarına gəlincə, uruqvaylı futbolçu ilə ''3+1'' illik müqavilə imzalanıb. Bu keçidə görə ''Trabzonspor'' ''Valensiya''ya 4 hissəyə bölərək ödəmək şərti ilə 3 milyon avro və oyunçunun sonrakı satışından 25 faiz pay verəcək. ''El Toro'' (öküz) ləqəbli hücumçunun illik maaşı isə 1,75 milyon avro təşkil edəcək.

Bu transferin rəsmiləşməsinin ardından ''Trabzonspor'' daha bir diqqətçəkən keçidə imza atdı. Belə ki, komanda öz yetirməsi olan Yusuf Yazıcını geri qaytarmağa müvəffəq oldu. 25 yaşlı futbolçu qarşıdakı mövsümü icarə əsasında ''bordo-mavililər''də keçirəcək! Xatırladaq ki, Yusuf 4 il ''Trabzonspor''un şərəfini qoruduqdan sonra 2019-da 17,5 milyon avroya ''Lill''ə transfer olunmuşdu. Bu, indiyə qədər də klubun rekord satışıdı. Ötən mövsümün 2-ci dövrəsini icarə əsasında ÇSKA-da keçirən Yazıcı yayda yenidən ''Lill''ə qayıtmalı olmuşdu. Fransa təmsilçisi istədiyi təklifi almayınca, sonda Yusufu doğma klubuna verməyə razı oldu. Türkiyə yığmasının üzvü Trabzondakı ilk dönəmində 100 rəsmi oyuna çıxaraq 22 qol, 21 məhsuldar ötürmə ilə yadda qalmışdı.

Bu arada ''Trabzonspor''un dünən superliqanın 5-ci turunun açılış oyunu çərçivəsində ''Ümraniyəspor''a qarşı keçirdiyi matçın iştirak ərizəsinə yeni transferlərin – Naci Ünüvarla Umut Bozokun da adının salınması diqqət çəkdi. Eləcə də son 6 rəsmi oyunda komandaya kömək edə bilməyən Marik Hamşik və yüngül zədələri olan Abdülkadir Ömür ilə Anastasios Bakasetasın da adı iştirak ərizəsinə salındı. Ən maraqlısı odu ki, Maksi Qomesin də ''30'' nömrəli forması hər ehtimala qarşı bu səfər matçına götürülmüşdü.