“Neftçi” təlim-məşq toplanışını iki məğlubiyyətlə bitirdi
“Neftçi” srağagün Türkiyədəki təlim-məşq toplanışını başa vuraraq ölkəmizə təşrif buyurdu. Bəs kollektivin Antalya macəraları necə keçdi? Öncə yaşananlara nəzər salaq. Daha sonra “ağ-qaralar”ın sonuncu yoxlama oyununa toxunacağıq.
Biirncisi, xatırladaq ki, Qara Qarayev, Reziuan Mirzov və Ataa Caber müalicə olunduğundan toplanışda iştirak etmədi. Bakılıların ilk sınaqçı-rəqibi “Ərzurumspor” olmuşdu ki, onlar yanvarın 6-da keçirilən matçdan 1:3 hesablı məğlubiyyətlə ayrılmışdı. “Neftçi”nin 10-cu dəqiqədə vurulan yeganə qolunun müəllifi isə Rəhman Hacıyev olmuşdu. Komandanın bu görüşdə qənaətbəxş çıxış etmədiyini vurğulamaqda fayda var. Yanvarın 13-də “ağ-qaralar”ın ikinci – sonuncu yoxlama oyununa şahidlik etdik. Bu dəfə rəqib Almaniyanın 3-cü bundesliqa təmsilçisi “Sportvereyn Valdhof” idi. Qeyd edək ki, bu rəqib turnir cədvəlində 20 iştirakçı arasında 16-cı yerdədi. Yeni baş məqşçi Miodraq Bojoviç bu dəfə start heyətində aşağıdakı futbolçulara güvənmişdi: Rza Cəfərov, Mark Tamaş, Dieqo Valdes, Emin Mahmudov (k), Eddi İsrafilov, Lukas Melano, Rəhman Hacıyev, Azər Salahlı, Yuri Matias, Yeqor Boqomolsi, Ervin Koffi.
Ehtiyat oyunçular: İvan Brkiç, Aqil Məmmədov, Höccət Haqverdi, Azər Əliyev, Andre Şinyaşiki, Filip Ozobiç, Kilan Lebon, İsmayıl Zülfüqarlı, Ömər Buludov. Fərid Yusifli.
“Neftçi”nin hədəflərindən xəbərdarsız. “Ağ-qaralar” ölkə kubokunun qalibi, premyer-liqanın gümüş medalçısı olmaq niyyətindədi. Belədə diqqət yetirilməli olan mövqelərdən biri də qapıdı. Maraqlıdı ki, Bojoviç heç bir oyunda Brkiçə şans vermədi. Onsuz da qolkiper daha öncə zədəli olduğundan yaşıl meydanlardan uzaq düşmüşdü. Monteneqrolu baş məşqçinin bu mənada seçimi anlaşmazlıq doğurmaya bilməz. Oyuna gəlincə, bakılıların sönük performansı nəzərdən yayınmadı. İddia etmək olardı ki, komandanı cəsarətsiz oyuna məhz “alman keyfiyyəti” məcbur etdi. Amma belə deyil. Çünki rəqib dəfələrlə cərimə meydançası yaxınlığında ciddi boşluqlara yol verdi. Buna baxmayaraq, nə Emin, nə Lukas, nə Kilan, nə Yeqor, nə Yuri, nə də Dieqo bu fürsətlərdən yararlana bildi. Təbii ki, sadaladıqlarımız iki hissə boyunca qapıya zərbə endirənlərin, daha doğrusu, “çərçivə”ni dəqiq nişan ala bilməyənlərin adıdı. Bu siyahı rəqibdə o qədər də geniş deyil. “Valdhof”un futbolçuları əks-hücumlarda, demək olar ki, qüsursuz oynadı. 9-cu dəqiqədə Kevin Qoden, 36-cı dəqiqədə Bentli Bakster, 76-cı dəqiqədə isə Yezaya Nerman “Neftçi”nin qapı torunu silkələdi. Qısası, rəqib az yoruldu, çoxlu qol vurdu. Ümumiyyətlə, “ağ-qaralar”ın haqqını yemək istəmərik. Hər halda, xeyli təhlükəli vəziyyət yaratdılar. 65-ci dəqiqədə Eddinin qırmızı vərəqə alaraq komandasını azlıqda qoyduğunu da qeyd edək. Reallıq isə odu ki, “Neftçi” bütün oyunboyu irəli atılsa da, hücumların son nöqtəsini qoymağa ürək etmədi. Bojoviçin matç haqda fikirləri belədi:
“Çox böyük fiziki yüklənmə var idi. Hazırlıqla bağlı ümumi danışsaq, düşünürəm ki, yaxşı təlim-məşq toplanışı oldu. Amma yoldaşlıq oyununda pis oynayaraq uduzduq. Futbolçuların performansından razıyam. Çox çalışırdılar, yaxşı işləyirdilər. Ancaq yorğunluq var. Bu da oyunda özünü əks etdirir və futbolçular fərdi səhvlər, top itkiləri edirlər".
“Neftçi”nin baş icraçı direktoru Fərrux Mahmudov da hazırkı durum, təlim-məşq toplanışı, transfer işləri və başqa məsələlər barədə düşüncələrini bölüşüb:
“Gözümə ilk dəyən komandadakı pozitiv ab-hava idi. Bunu çoxdan görmürdüm. Kollektiv bir olmuşdu. Bu ab-hava çox xoş idi. Əmin oldum ki, fasilə zamanı futbolçular ailələri ilə kifayət qədər vaxt keçirib. Ona görə də yaxşı əhval-ruhiyyə ilə qayıdıblar. Çətin bir il idi. Buna baxmayaraq, 3-cü pillədə qərarlaşdıq. Mövsümün qalan hissəsində gərgin mübarizəyə hazır olmalıyıq. Hədəfimiz avrokuboklarda iştirak etməkdi. İnanıram ki, yaxşı olacaq. Bilindiyi kimi, yeni ildə yeni baş məşqçidən başqa yeni məşqçilər heyəti də gəlib. Yeni qapıçılar üzrə məşqçimiz də buradadı. Emil Babayev bizə qoşuldu. İdman Departamentimiz əllidən çox oyunçuya baxış keçirib, beş futbolçuya fokuslanıb. Artıq iki oyunçuya təklif göndərilib, cavab gözləyirik. Hər ikisi hücumçudu. Təəssüf ki, hazırda adlarını deyə bilmərəm. Gözləntilərimə gəlincə, həm azarkeş, həm də rəhbər kimi ancaq qələbə gözləyirəm. Həmçinin əzmkar oyun istəyirəm. Meydançaya ruhlarını qoysunlar”.
KƏNAN BAHADIR
Digər xəbərlər
