“Sabah” ötən mövsüm 2-ci yeri tutub avrokuboklara vəsiqə qazananda çoxları düşündü ki, məhz bu komanda 2023/24 müvsümündə də dominantlıq etməklə yanaşı, “Qarabağ”ın yolunda sədd olacaq. Amma sən saydığını say, gör fələk nə sayır.

Komandada qısa fasilələrlə “yarpaq tökümü” başladı. Əvvəlcə Aleksey Kaşuk, ardından Coy-Lens Mikels “Sabah” donanmasını tərk etdi. Bu futbolçuların gedişi komandanın oyun ansamblına təsirsiz ötüşmədi. Hansı ki, həm baş məşqçi Murad Musayev, həm idman direktoru İqor Ponomaryov, həm də futbol biliciləri bu məqamı hər uğursuzluqda dilə gətirdilər. Yanvarın 4-də “bayquşlar”ın düşərgəsini daha bir futbolçu tərk etdi. Söhbət yığmamızın üzvü, Masazır təmsilçisinin vitse-kapitanı Aleksey İsayevdən gedir. “Sabah”ın əsas oyun qurucusu “Qarabağ”a keçdi. Söz yox, onun transferindən “bayquşlar” yaxşı maddi qazanc götürdü. Belə ki, pleymeykerə görə “köhlən atlar” “Sabah”a 500 min dollar təzminat ödədi.

Bu gün çoxlarını düşündürən sual budu ki, Aleksey İsayev Qurban Qurbanovun komandasına nə dərəcədə kömək edəcək? Hətta bunu uğursuz transfer sayanlar da az deyil. Məni isə “Sabah”ın taleyi narahat edir. Onsuz da turnir cədvəlində 8-ci pillədə olan klubun vəziyyəti ağırdı. Alekseyin gedişi vəziyyəti bir qədər də qəlizləşdirəcək. İndi komandanın oyunlardakı əsas dirijoru kim olacaq?

Təbii ki, klub rəhbərliyi “10 nömrə”nin boşluğunu aradan qaldırmaq üçün düşünür. Bu mövqeyi yeni oyunçu axtarışına da start verilib. Bunu İqor Ponomaryov da açıqlamasında bildirib. Amma yayda komandaya cəlb olunan Vinsent Til, Jarl Marqarita, Karim Parris, Cessi Sekidika eləcə də çempionatın gedişində böyük ümidlərlə “Sabah” ailəsinə qatılan İshak Belfodil etimadı doğrulda bilməyib. Bunları nəzərə alsaq, klubun qış transfer siyasətində uğurlu olacağına bədbin yanaşılmalıdı. Hər halda, seleksiya işləri gedir. Bunun nə dərəcədə faydalı olacağını zaman göstərəcək.

Məşhur deyimimiz var: “Şər deməsən, xeyir gəlməz”. Yəni “Sabah” qış fasiləsində güclənə bilməsə, Murad Musayev əlinin altındakı oyunçulardan hansını Alekseyə alternativ kimi istifadə edə bilər? Rusiyalı mütəxəssislərin bu variantları var:

1. Kristian da Silva. Braziliyalı bir neçə ildi “Sabah”dadı, pis-yaxşı özünü doğruldub. “Sambaçı” bəzi oyunlarda oyun qurucusu kimi də çıxış edib. Hesab edirəm ki, komandanın oyun üslubuna bələd olan Kristianı Murad Musayev pleymeyker kimi yoxlaya bilər.

2. Ayaz Quliyev. Rusiyada çıxış etmiş soydaşımız Masazır təmsilçisinə böyük ümidlərlə cəlb olunub. Onun yerli pasport alması “bayquşlar” üçün əlavə üstünlüyə çevrildi. Rusiya premyer-liqasında oyun təcrübəsi olan Ayaz mərkəz yarımmüdafiçisidi. Elə “Sabah”da hələlik az şans qazansa da, baş məşqçi onu Alekseyə yaxın mövqeydə sınayırdı. Futbolçu artıq uyğunlaşma dönəmini arxada qoyub. Onun 2-ci yarıda daha uğurlu çıxış edəcəyini düşünürəm. Ayazın potensialına bələd olan Murad Oleqoviçin ona oyun qurucusu mövqeyində şans verəcəyi şübhə doğurmur.

3. Jarl Marqarita. Niderlandlı futbolçu ilə bağlı da gözləntilər böyük idi. Onun sürəti, texnikası, fərdi kreativ oyunu olsa da, hələlik özünü yaxşı tərəfdən göstərə bilməyib. Baş məşqçi əksər oyunlarda Jarlı Tilin yerinə oynadı. Amma o, lüksemburqlunu heyətdən sıxışdıra bilmir. Vinger kimi gözlənilən effekti verməyən qaradərilinin “dirijor” kimi sınanması gözlənilir. Onun texnikası mərkəzdən hücumların qurulmasında daha çox fayda verə bilər.

4. Namik Ələskərov. Yığmamızın üzvü vinger olsa da, onu yeri gələndə doğma mövqeyi ilə yanaşı, hücumçu, bəzən pleymeyker kimi də görmüşük. Namikin ifasında bəzən hiyləgər ötürmələrə də şahid olmuşuq.

5. İshak Belfodil. Top-liqa təcrübəsi olan 31 yaşlı forvard hələlik tam formada deyil. Ona görə də Murad Musayev fransalının xidmətindən yetərincə faydalana bilmir. Əlcəzair millisinin sabiq üzvü şans qazandığı görüşlərin yalnız birində 90 dəqiqə meydanda olub və hələlik ciddi bir üstünlüyü ilə fərqlənə bilməyib. Buna rəğmən, bəzi oyunlarda Belfodil uzun asmalar və ara ötürmələri ilə yadda qalıb. Hazırda hücumçunun zədəsi də var. Onsuz da irəli xətdə möhkəmlənməkdə çətinlik çəkən, hələlik Apehlə Volkova uduzan təcrübəli futbolçunu çempionatın 2-ci yarısında oyun qurucusu kimi yoxlamaq daha məntiqlidi. Bəlkə Belfodil top-liqa təcrübəsini bu mövqedə ortaya qoya bildi.

İstənilən halda “bayquşlar” “dirijor” funksiyası ilə bağlı əngəli qısa zamanda həll etməlidi. Əks təqdirdə Masazır təmsilçisində hücumlar kortəbii xarakter alacaq, onlar rəqib qapısı qarşısında ciddi qol vəziyyətləri yarada bilməyəcəklər.

ABDULLA İSMAYILOĞLU