Dünən Misli premyer-liqasında qış fasiləsinin ən səs-küylü transferi gerçəkləşdi. "Sabah"ın vitse-kapitanı - Aleksey İsayevi artıq "Qarabağ"a məxsusdu. "Köhlən atlar" 500 min ABŞ dollarına qıyıb təcrübəli yarımmüdafiəçini "tələbələr"in əlindən aldı.

Bunun Ağdam təmsilçisi üçün bütün istiqamətlərdə düzgün addım olduğuna şübhə yoxdu. Hər halda, "Qarabağ" Qara Qarayev, Ramil Şeydayev, Musa Qurbanlı kimi üç yerli və aparıcı oyunçu ilə vidalaşandan sonra yaranan boşluqları doldurmağın yolunu tapmalıydı.

Əslində belə yanaşmanı "Sabah"dan da gözləmək sadəlövhlük deyildi. Çünki kollektiv ötən mövsüm yaxşı nəticələr qazanaraq favoritlər sırasına qoşulmuşdu. Sonradan Aleksey Kaşuk və Coy-Lens Mikels kimi futbolçuları itirdi. Belədə daha üstün futbolçular transfer edilməliydi. Bəlkə də etdilər, amma yeni oyunçular sanki komandaya uyğunlaşmamağa and içdiyindən "bayquşlar"ın 18 tur ərzində sürətli çöküşünü izləməli olduq.

Məsələylə bağlı son nöqtəni isə azarkeşlərin ümidlərini və gözləntilərini öldürən baş məşqçi Murad Musayev qoydu. Özü də "daha ötənilki "Sabah" olmayacaq" sözləriylə... Çox güman, rusiyalı mütəxəssis bu sözləri deyərkən İsayevin də komandadan ayrılacağını bilirdi, bu üzdən belə qənaətə gəlmişdi.

Şəxsən mən çalışdırıcının belə sözlərini eşidəndə təəccüblənmişdim. Çünki Murad Musayev emosional, çılğın, tələbkar və "sonunu düşünən qəhrəman ola bilməz" prinsipiylə yaşayan biri kimi təsir bağışlayır. “Ağ bayraq qaldırmağı” onun məşqçi xarakterinə heç cür yaraşdırmamışdım. Özü də mənimlə razılaşar. Hər halda, belə biri olmasaydı, 2022-ci ilin oktyabrında "sports.ru" saytına açıqlamasında "məğlubiyyətlərdən sonra yata bilmirəm. Ağrılar əl çəkmir, gözümə yuxu getmir. Növbəti qələbəyə qədər qəzəbli və hövsələsiz oluram. Hətta dərmanlar atıram..." ifadəsini işlətməzdi...

İndi nə edək? "Sabah"ın daha ötənilki kimi olmamasının günahını Murad Musayevdə axtaraq? Yoxsa çoxlu pul qazanmaq istəyiylə ən yaxşı oyunçuları satıb premyer-liqanın aşağı pillələrində qərarlaşmağa razı olan rəhbərlikdə?

Bu sualların cavabını zaman verəcək. Hələ ki bəlli olan üç şey var: rəhbərlik qazandı, baş məşqçi təslim oldu, "Sabah" dünəndə qaldı...

KƏNAN BAHADIR