“Adana Dəmirspor” dünən Türkiyə superliqasının 19-cu turu çərçivəsində səfərdə “İstanbul BŞ” ilə qarşılaşıb – 0:0. Millimizin qapıçısı Şahruddin Məhəmmədəliyev bu qarşılaşmaya start heyətində başlayıb və sonadək oynayıb.

Qolkiper bu matçda kobud səhvlə yadda qalıb. Belə ki, futbolçu 70-ci dəqiqədə komanda yoldaşına ötürmə vermək istəsə də, top rəqibin oyunçusu Əmirxan İlxanın önünə düşüb. Belədə mərkəz yarımmüdafiəçisi fürsətdən istifadə edərək hesabı açsa da, qol qeydə alınmayıb. Görüşün baş hakimi Turqut Tomal VAR-a baxandan sonra müdafiəçi Şahruddinə ötürmə verərkən rəqibin oyunçusunun cərimə meydançasına daxil olmasını əsas gətirib, yəni qayda pozuntusu qeydə alıb. Lakin bu məqam “Adana Dəmirspor” azarkeşlərinin qəzəblənməsinə mane ola bilməyib. Klubun rəsmi sosial şəbəkə hesablarında oyun haqda fikirlərini bölüşən tərəfdarlar Şahruddini tənqid edib, qapıçının transferinə görə prezident Murat Sancakı günahkar görüb. Sizi bəzi rəylərlə tanış edirik.

“Mütləq yaxşı qapıçı transfer edilməlidi. Belə olmaz”.

“Ərtaç Özbir komandaya xəyanət etdi. Şahruddinin gəlişindən sonra belə olacağı bəlli idi. Murat bəy, komandanı batırmaq istəyirsiz? Güclü qapıçı istəyirik”.

“Şahruddini göndərin...”

“Bu qapıçıyla bu il də olmasa, gələn il 1-ci liqa bizi gözləyir”.

“Azərbaycandan gələn yeni oyunçu çox risk edir. Deyəsən, macəra axtarır. Düzdü, əla seyvləri də var, amma bizi bu qədər həyəcanlandırmağa haqqı yoxdu”.

“Şahruddin avrokubok oyunlarında bütün azərbaycanlıları hövsələdən çıxarırdı. Deməli, sıra bizdədi”.

“Məhəmmədliyev, özünə gəl. “Adana Dəmirspor” “Qarabağ” deyil ki, səni bağışlasın!”

Qeyd edək ki, “Adana Dəmirspor” 28 xalla 7-ci sırada qərarlaşıb.

KƏNAN BAHADIR