Bir neçə gün öncə millimizin üzvü, "Qarabağ"ın sabiq qapıçısı Şahruddin Məhəmmədliyevlə bağlı araşdırma təqdim etmişdik.

Yazıda "CBC Sport"un eksperti Elçin Cəfərovla birlikdə qolkiperin yeni komandası "Adana Dəmirspor"da şans qazanmamasının səbəblərindən və başverənlərin oyunçunun karyerasına təsirindən bəhs etmişdik.

Dünən redaksiyamıza daxil olan məlumata görə, yerli oxucuların da maraqla qarşıladığı yazıdan "Adana Dəmirspor"un prezidenti Murad Sancak da xəbərdardı. Funksioner azərbaycanlı azarkeşlərin marağını nəzərə alaraq baş məşqçi Patrik Klyuvertə müraciət edib. Belə ki, o, Şahruddinə start heyətində şans verilməsini xahiş edib. Nəticədə dünən Türkiyə superliqasının 14-cü turun "Adana Dəmirspor" - "Samsunspor" matçında bizim qolkiper meydana çıxıb.

Çox təəssüf ki, bu dəfə də ümidləri doğrultmayıb. Qapıçı "çərçivə"yə gələn zərbələrdən üçünün qarşısını ala bilməyib. Oyunu izləyərkən epizodların o qədər də təhlükəli olmadığını görürük. Futbolçu penaltidən vurulan qolda topun istiqamətini düzgün müəyyənləşdirə bilməyibsə, ikinci və üçüncüdə özünü lazım olan nöqtəyə yetirə bilməyib. Nəticədə komandası 2:3 hesabıyla uduzub. Bu, həm də komandanın mövsüm ərzində ilk ev məğlubiyyəti olub. Şahruddinin 3 vacib seyvi də diqqətimizi çəkdi. Yəni məqsəd onu pisləmək, təzyiq altında saxlamaq deyil. Qolkiper müəyyən epizodlarda vəzifəsinin öhdəsindən layiqincə gəldi.

Ümumiyyətlə, matçı izləyənlər bilir ki, millimizin üzvü özünü yaxşı tərəfdən göstərmək üçün əlindən gələni edib. Lakin bəzən reallıqla barışmaq lazımdı. Nə qədər istəsən də, arzuladığın nəticəni ortaya qoymaq mümkün deyilsə, ya sənə zaman lazımdı, ya da artıq çox gecdi. Ümid edirik ki, səbəb birinci olar. Bu öz yerində. Amma Şahruddin ona dayaq olan Azərbaycan mətbuatını və azarkeşləri məyus etməyə davam edir. Deyəsən, "Adana Dəmirspor"un ehtiyat oyunçular oturacağı yetərincə isti, hüzurlu və sakitdi. Görünür, qolkiper o skamyadan fiziki və psixoloji yorğunluqdan xilas olmaq üçün istifadə etmək niyyətindədi. Şahruddin bizə deməyə yalnız bir söz qoydu...

Xoş istirahətlər, "Şah"...

KƏNAN BAHADIR