''Adana Dəmirspor''un prezidenti öz oyuncusunu yalançı çıxardı
Türkiyənin iddialı klublarından sayılmasına baxmayaraq son dönəmlərdə maliyyə problemləri yaşayan və aparıcı futbolçularla vidalaşmalı olan ''Adana Dəmirspor''da daha bir olay yaşanıb.
"Football-plus.az" xəbər verir ki, ən son Yunes Belhanda və Kevin Rodrigeslə yollarını ayıran adanalılarda bu dəfə Mbaye Nianq açıqlamaları ilə diqqət çəkib.
Seneqalli forvard ''Ekip'' nəşrinə bunları deyib:
''Əslində Türkiyədə meydanın içindəki təcrübəm çox yaxşı keçir. Yaxşı oynayıram və əsas heyət üzvüyəm. Amma pulumu vaxtında ala bilmirəm. Bu da diqqətimi oyunlara yönəltməyimə mane olur. Biraz gecikmə olanda normal qarşılayıram. Amma bu dəfə 4 aydı, pulumu ala bilmirəm! Ona görə də ayrılmaq istəyirəm. Rəhbərliyə də bu barədə xəbər vermişəm. Menecerim mənə yeni klub axtarır. Fransaya qayıtmaq əla olardı. Rusiya, İtaliya, Səudiyyə Ərəbistanından da təkliflər var. Özümə güvənirəm və hələ də yüksək səviyyədə oynaya bildiyimi sübut etmək istəyirəm''.
Nianqın bu sözlərinə ''Adana Dəmirspor'' başqanı Murat Sancak dərhal cavab verib. O, paylaşımında bunları yazıb:
''Yalan söyləyirsən! Sənə 1 avro da borcumuz yoxdu. Borcumuz olsaydı, çoxdan müqaviləni ləğv edib ayrıla bilərdin. Amma ayrılmaq istəyirsənsə, təzminatı gətir, sonra hara istəyirsən, get. Yolun açıq olsun. Təklifləri səbirsizliklə gözləyirik''.
Bundan başqa Sancak Nianqa edilən ödənişin sənədinin şəklini də paylaşıb.
Nianqa maraq göstərən əsas klub ''Renn''di. O, daha öncə 2018-21-ci illərdə bu klubun şərəfini qoruyub və 92 oyuna 30 qol vurub. ''Adana Dəmirspor''a 2023-ün yayında gələn 29 yaşlı hücumçu cari mövsüm 20 rəsmi oyunda 8 qol, 2 məhsuldar ötürməlik performans sərgiləyib.
ƏLİ
Digər xəbərlər
