"Tam səmimi deyim ki, "Araz-Naxçıvan"dan başda mən olmaqla azarkeşlərimiz belə çıxış gözləmirdi. Bunun çoxlu səbəbi var idi, bəzilərini diqqətinizə çatdırım. Əvvəla komanda 1-ci liqada çempion olandan sonra heyətin 70 faizdən çoxu dəyişdi, stadionumuz elitada oyunlar keçirməyə yararsız hesab edildi. Bu üzdən ev oyunlarını harda keçirəcəyimizi bilmirdik. Yeni futbolçularla güclənmək və heyəti komplektləşdirmək də xeyli vaxt apardı. Buna rəğmən, turlar irəlilədikcə inkişaf etdik. Özümüz və rəqiblərimiz "Araz-Naxçıvan"a autsayder gözüylə baxdığımız halda, əksi baş verdi. Bunun da başlıca səbəbkarı Azər Bağırovdu. Gənc baş məşqçimiz nəinki autsayder adını üzərimizdən götürdü, hətta iddialı bir komanda olduğumuzu göstərdi. Güclü rəqibləri sıradan çıxardıq, 3-cü pilləyə qədər yüksəldik. Düşünürəm ki, 2-3 oyunda məğlub olmasaydıq, çempionatın ilk yarısını ilk "4-lük"də bitirəcəkdik. Hazırda turnir cədvəlinin ortalarındayıq. Amma inanıram ki, qış fasiləsindən sonra iddiamızı ortaya qoyacağıq".