"Komandamızın 1-ci yarıdakı çıxışından razıyıq. Hakimlərin qərəzli qərarları olmasaydı, daha yaxşı olardı. Məhz referilərin haqsızlıqlarına görə bir neçə oyunda təmiz qolumuz hesaba alınmadı, xeyrimizə penaltilər verilmədi, futbolçularımıza qarşı kobudluqları görməzdən gəldilər - bu kimi hallar oldu. Bunlar olmasaydı, bəlkə indi qış fasiləsinə 2-3-cü pillələrdə yollanardıq. Ayxan Abbasov klubumuza gələndən hansı çətinliklər, əzab-əziyyətlə sıfırdan yeni komanda qurdu. Bunlar hamısı gözümüzün önündə olub. Odu ki, Ayxan hocanın xidmətlərini bütün tovuzlu futbolsevərlər yaxşı bilir. Şükürlər olsun, Allah bizə Ehtiram müəllim kimi dəstək olan iş adamını nəsib etdi. Qısası, futbol oynamaq üçün "Turan Tovuz"a bütün şərait yaradılıb. Bircə hakim haqsızlığı olmasa, bütün rəqiblərimizlə meydanda döyüşə bilərik. Təbii ki, “hər dəfə qələbə qazanacaqsan” kimi qayda yoxdu. Amma məğlub da olanda oyunumuzla döyüşüb yenilsək, bizim üçün qəbuldu. Referilərin səhvlərindən dolayı məğlub duruma düşməyimiz xoş deyil. Tribunalardan Ayxan hocanın istefasıyla bağlı şüarlar səsləndirənlərə gəlincə, onların heç biri "Turan Tovuz"u sevən, onun ağır günlərində yanında olan şəxslər deyil. Əminliklə deyirəm ki, fanklub arasında elə şüar səsləndirənlər yoxdu. O cür şüar səsləndirənlər uğurumuzu istəməyənlərdi. Onlar hər vasitəylə klubun içinə soxulub ara qarışdırmaq istəyirlər. Amma biz onlara imkan verməyəcəyik. Çempionatın 2-ci yarısında da uğurlu çıxış edəcəyimizə inanıram. Komandamıza həm ev, həm də səfər oyunlarında bütün gücümüzlə dəstək verəcəyik".