Dünən Səudiyyə Ərəbistanında baş tutmalı olan, amma yerli hökumətin qəribə qadağaları üzündən baş tutmayan ''Qalatasaray'' - ''Fənərbaxça'' derbisinin müzakirələri davam edir.

Xatırladaq ki, ərəblər futbolçuların meydana Atatürkə aid pankart və ya köynəklərlə çıxmağına qadağa qoydu. Hər iki İstanbul nəhəngi buna etiraz əlaməti olaraq oyuna çıxmadı. Ərəblərin Türkiyə cümhuriyyətinin qurucusu və ilk prezidenti Atatürkə olan bu antipatiyası fonunda karyerasını bu ölkədə davam etdirən türkiyəli futbolçular da dərhal diqqət mərkəzinə düşdü.

Hazırda yalnız bir futbolçu - Türkiyə yığmasının üzvü Merih Dəmiral Səudiyyə Ərəbistanında çıxış edir. O, ''Əl-Əhli''nin şərəfini qoruyur. 25 yaşlı futbolçunun hadisəyə reaksiya bildirməməsi və heç bir paylaşım etməməsi türkiyəli futbolsevərlər tərəfindən birmənalı qarşılanmadı. Saha sonra Merih türkiyəli jurnalist Yağız Sabuncuoğluna ilk açıqlamasında bunları dedi: ''Hadisə yaşandığı anlarda bizim ''Əl-Xalic''ə qarşı oyunumuz var idi və mən də meydanda idim.

Oyun bitdikdən sonra hər şeydən xəbər tutdum. Bu hadisə üzərindən insanların mənə zərər vurmağa çalışması üzücüdü. Oyunu təşkil edə bilməyən federasiyadı, mən deyiləm''. Bundan başqa 25 yaşlı futbolçu sosial şəbəkədə ona etiraz edən bir futbolsevərə ''eyni saatda oyunda olduğumu bilirsən. Buna baxmayaraq ''layk'' və şərh yığmaq üçün bu cür süni şou edirsən. Allah bəlanızı versin'' sözləri ilə çox sərt şəkildə cavab verdi. Xatırladaq ki, Merih ''Əl-Əhli''yə bu mövsümün əvvəlində 16,6 milyon avroya ''Atalanta''dan keçib. Onun Səudiyyə Ərəbistanında illik qazancı 11 milyon avrodu!

ƏLİ