Deyəsən, qarşıdakı mövsümdə Səudiyyə Ərəbistanında tanınmış bir türkiyəli futbolçunu da izləyəcəyik.

“Football-plus.az” xəbər verir ki, söhbət Merih Dəmiraldan gedir. “Atalanta”nın baş məşqçisi Canpyero Qasperrini ilə münasibətləri korlanan, əsas heyətdən kənarlaşdırılan və artıq neçə müddətdi fərdi məşq etmək məcburiyyətində qalaraq özünə yeni klub axtaran Merih “Əl-Əhli”yə keçmək üzrədi. Əslində Türkiyə yığmasının üzvünə “İnter” ciddi maraq göstərirdi. Eləcə də “Fənərbaxça” yetirməsini geri qaytarmaq üçün uzun müddət dəridən-qabıqdan çıxdı. Onun “İnter”ə transferi maliyyə məsələləri üzündən baş tutmadı. “Fənərbaxça”dan isə vaxtilə incik şəkildə ayrıldığı üçün ora qayıtmaq istəmədi. Deyilənə görə, Merihə premyer-liqa klubları da maraq göstərirdi. Srağagün bəlli oldu ki, “Əl-Əhli” ona görə “Atalanta”ya 20 milyon avro ödəməyə razıdı. Artıq klublar arasında razılıq əldə olunub. 25 yaşlı futbolçunun karyerasının ən yaxşı dönəmində Avropada qalmaq əvəzinə Səudiyyə Ərəbistanına yollanması heç də yaxşı hal deyil. Amma digər tərəfdən 1 mövsümü oynamayaraq boşa vermək əvəzinə “Əl-Əhli”yə keçmək yaxşıdı. Üstəlik ərəblər futbolçunun özünə bonuslardan əlavə astronomik məbləğ – illik 10 milyon avroluq maaş təklif edib! Müqavilənin üçillik olacağı gözlənilir. “Atalanta” bu satışdan əldə edəcəyi pulun 10 faizini “Yuventus”a verəcək.

Xatırladaq ki, 2019-21-ci illərdə “Yuve”nin şərəfini qoruyan Türkiyə yığmasının üzvü 2021/22-ni icarə əsasında “Atalanta”da keçirmişdi. Berqamolular ötən yay 20 milyon avro ödəyərək onu daimi əsasda transfer etmişdilər. Amma 2-ci dövrənin gedişində məşqçilər korpusu ilə problem yaşayan Merih martdan sonra start heyətinə həsrət qaldı. Ümumilikdə 2 il ərzində o, “Atalanta”da 70 rəsmi oyuna çıxaraq 3 qol vurub.