Cari mövsümü Türkiyə yığmasının iki əsas mərkəz müdafiəçisi Çağlar Söyüncü ilə Merih Dəmiral üçün uğurlu adlandırmaq çətindi.

Çağlar “Lester”lə müqaviləni yeniləmədiyi üçün mövsümboyu gününü ehtiyat oyunçular skamyasında keçirməli oldu. O artıq “Atletiko” ilə anlaşıb və yayda azad agent statusunda Madridə yollanacaq. Merihin isə son dönəmlərdə “Atalanta”da əsas heyətdəki yerini itirməsinin səbəbi bəlli deyil. Onun baş məşqçi Canpyero Qasperrini ilə qışdan bu yana münasibətləri korlanıb. Bu arada türkiyəli jurnalist Yağız Sabuncuoğlunun verdiyi məlumata inansaq, son məşqdə Dəmiralla Qasperrini arasında çox ciddi münaqişə yaşanıb. Amma bu mübahisənin nədən baş verdiyi bilinmir. Klubdan məsələ ilə bağlı heç bir açıqlama verilməyib. Ümumiyyətlə, şayiələrə inansaq, Berqamo təmsilçisində ab-hava yaxşı deyil. Qasperrini ilə tək Dəmiral yox, başqa oyunçular da yola getmir. Əslində 25 yaşlı futbolçu mövsümə əsas heyət üzvü kimi başlamışdı. Merih DÇ-yə qədər A seriyasında baş tutan 15 turun 12-də əsas heyətdə meydana çıxmışdı. Amma mundialdan bu yana 16 turda cəmi iki dəfə “11-lik”də meydana çıxıb. Belə güman etmək olar ki, Dəmiralla Qasperrinin münasibətləri transfer məsələsi üzündən korlanıb. Çünki qış transfer dönəmində “İnter” bu oyunçuya ciddi maraq göstərirdi. Elə Dəmiral da karyerası baxımından Milan klubuna keçidi irəliyə doğru addım sayırdı. Üstəlik Türkiyə yığmasının kapitanı Hakan Çalhanoğlu da “İnter”də çıxış edir. Amma iddialara görə məhz Qasperrini Merihin “İnter”ə keçidinə mane olub. Bu transfer söhbətindən sonra bu ikili arasında sanki “qara pişiyin keçdiyini” nəzərə alsaq, onda bu iddialara inanmaq olar. İtaliyada daha öncə “Sassuolo” və “Yuventus”un şərəfini qoruyan türkiyəli oyunçu “Atalanta”da 2-ci mövsümünü keçirir. O, indiyə qədər berqamoluların heyətində 67 rəsmi oyuna 3 qol vurub.