“Hatayspor”un son dönəmlərdə işləri qaydasında getmir. Halbuki komanda mövsümə inamlı başlamışdı.

Fevralda baş verən dəhşətli zəlzələdən sonra ötən mövsümün ikinci dövrəsində çempionatdan çəkilmək məcburiyyətində qalan və bu mövsüm ev oyunlarını Mersində keçirən Hatay təmsilçisi ilk 8 turda uduzmamaqla çoxlarını təəccübləndirmişdi. Amma həmin vaxtdan bəri çox şey dəyişib. Son turda hataylılar evdə “Beşiktaş”a boyun əydilər (1:2). Komandanın son 9 turda cəmi 1 qələbəsi var (2 heç-heçə, 6 məğlubiyyət). Ən maraqlısı odu ki, həmin o qələbə “Qalatasaray” ilə oyunda əldə olunub! Son çempionun cari mövsüm başqa məğlubiyyəti yoxdu. “Beşiktaş”a qarşı oyunun ardından baş məşqçi Volkan Dəmirəl sürpriz açıqlamalar verdi. “Bu komanda üçün hər şey edən, bu futbolçuları bura gətirən mənəm. Söyləyəcək çox şey var, amma söyləyə bilmirəm. İnşallah, önümüzdəki günlərdə söyləyəcəm. O vaxta qədər isə hər şeyi düşünəcəm” deyən mütəxəssisin bu sözləri onun istefa verməyə hazırlaşması kimi qiymətləndirilmişdi. Amma rəhbərlik Dəmirəli buraxmaq niyyətində deyil. Hətta onun istefası da qəbul olunmayacaq. Bunu klubun başqan vəkili Aydın Toksöz dilə gətirib: “Düzdü, bəzən bizimlə söhbətdə artıq yorulduğuna işarə vurur. Amma istefasından söhbət gedə bilməz. Zatən bizə bu haqda heç nə deməyib. İstefasına aid heç bir şey gəlməyib. Belə bir durum olsa da, qəbul etməyəcəyik. Volkan Dəmirəlin bu klub üçün etdiklərini heç vaxt unutmayacağıq. İndiki şərtlərdə “Hatayspor”un superliqada oynaması, meydana çıxması artıq böyük uğurdu. Bizim gündəmimizdə baş məşqçi dəyişikliyi yoxdu”.

Qeyd edək ki, məşqçi karyerasına doğma klubu “Fənərbaxça”da köməkçi işləməklə başlayan 42 yaşlı Dəmirəl müstəqil olaraq bu sahədə ilk təcrübəsini 2021/22-də “Fatih Karagümrük”də yaşamışdı. “Hatayspor”un başına isə o, ötən ilin sentyabrında keçmişdi. Dəmirəl zəlzələ zamanı həm kluba, həm də Hatay əhalisinə etdiyi yardımlarla diqqəti çəkmişdi. Ümumilikdə “Hatayspor” bu məşqçinin rəhbərliyi altında indiyə qədər keçirdiyi 36 rəsmi oyundan 12 qələbə, 11 heç-heçə, 13 məğlubiyyətlə ayrılıb.