Çərşənbə axşamı İspaniya çempionatında 18-ci turun ilk üç oyunu keçirildi.

“Football-plus.az” xəbər verir ki, “Atletiko” – “Xetafe” qarşılaşması azarkeşlərə parlaq futbol tamaşası bəxş etdi. Oyunun ilk 38 dəqiqəsi heç bir xüsusi intriqa vəd etmirdi, komandalar təşəbbüsü ələ almağa çalışırdı, təhlükəli vəziyyətlərin sayı az idi. Amma 38-ci dəqiqədə Mata ilə mübarizə zamanı rəqibin sifətinə dirsəklə vuran Saviçin meydandan qovulmasıyla hər şey dəyişdi. Maraqlıdı ki, “hindular” azlıqda qalsalar da, ilk yarının sonunda hesabı açdılar. 2-ci hissədə isə oyunun axarı tez-tez dəyişdi, əsl tamaşa izlədik. Hissənin əvvəlində “Xetafe” hesabı bərabərləşdirdi. Ancaq Morata ilə Qrizmannın 6 dəqiqəlik intervalla vurduğu iki qol hesabı 3:1 etdi. Azlıqda üç qol vurmaq hər komandanın bacara biləcəyi iş deyil. Məntiqlə 3:1-dən sonra oyunun taleyi həll olunmalıydı. Ancaq yox, “Xetafe” təslim olmaq fikrində deyildi. Qonaqlar qısa sürən ruh düşkünlüyündən sonra topa nəzarəti ələ keçirdilər və Oblakın qapısını “atəşə tutdular”. 87-ci dəqiqədə Rodrigesin zərbəsindən sonra Qrizmanndan səkən top tora daxil oldu. Xalın qoxusunu hiss edən “Xetafe”nin oyunçuları daha böyük həvəslə irəli atıldı. Uzatma dəqiqələrində top Rikelmenin əlinə dəydiyinə görə hakim VAR-ın da yardımı ilə penalti nöqtəsini göstərdi. Cari mövsümün bombardirlərindən biri Mayoral hesabı bərabərləşdirmək imkanını əldən vermədi. Qonaqlar son dəqiqələri də hücumda keçirdi, hətta 4-cü qolu vurmağa da yaxın oldu.
Ötən tur evdə “Xetafe” önündə darmadağın olandan sonra baş məşqçi Dieqo Alonso ilə yolları ayıran “Sevilya” bu dəfə səfərdə “Qranada”ya eyni aqibəti yaşatdı. Komanda Kike Sançes Floresin rəhbərliyi altında keçirdiyi elə ilk oyunda La Liqadakı 10 oyunluq qələbəsiz seriyaya son qoydu. Əvəzində “Qranada”nın qələbəsiz oyunlar seriyası 15-ə çatdı.
Oyuna daha fəal başlayan “Sevilya” 23-cü dəqiqədə Pedrosanın sayəsində hesabı açdı. Cəmi 9 dəqiqə sonra fərq artdı. Ən-Nəsiri meydanın rəqibə aid hissəsində topu ələ keçirdi, ardından Okampos uzaq məsafədən zərbə ilə komandasının 2-ci qolunu vurdu.

“Qranada”nın baş məşqçisi Aleksandr Medina fasilədə Vilyarı Uzuni ilə əvəzləsə də, oyunun axarını dəyişə bilmədi. Əksinə, 2-ci hissə yenicə başlamışdı ki, Ramos cərimə meydançasındakı qarışıqlıqdan yararlanıb baş zərbəsi ilə “Sevilya”ya dönüşündən bəri La Liqada ilk qolunu vurdu.

Sona 16 dəqiqə qalmış hakim qonaqlardan Buenoya Boyeyə qarşı kobudluğa görə birbaşa qırmızı vərəqə göstərdi. Ancaq VAR-ın müdaxiləsindən sonra “qırmızı”nı “sarı” ilə əvəzlədi. Beləliklə, “Sevilya” cari mövsümdə səfərdə ilk qələbəsini qazandı.
“Valensiya” da çərşənbə axşamı qələbəyə sevinən komandalardandı. “Yarasalar” son 5 turda 3 xala sevinməmişdi. Onlara qələbə gətirən qolu 61-ci dəqiqədə Kanyos vurdu. Bununla da “Rayo Valyekano”nun evdəki qələbəsiz oyunlar seriyası 7-yə çatdı.

Kanyos hesabı açandan az sonra “Valensiya”nın baş məşqçisi Ruben Baraxa kütləvi əvəzetmələrlə taktikanı dəyişdi. Arxa xətti gücləndirmək üçün Fulkyeni meydana buraxdı. “Rayo Valyekano” məğlubiyyətdən qurtulmaq üçün əlindən gələni etdi. Ancaq Baraxanın dəyişiklikləri ilə yanaşı, qonaq futbolçuların müntəzəm kobudluğa əl atması da oyunun tempini aşağı saldı. Hətta 90+1-ci dəqiqədə Korreyya növbəti kobudluğa görə meydandan qovuldu və “Valensiya”nı azlıqda qoydu. Ancaq meydan sahiblərinin hesabı dəyişmək üçün gücü qalmamışdı.

18-ci tur
Atletiko – Xetafe 3:3
Qrizmann, 44; 69-p. Morata, 63 – Mayoral, 53; 90+3-p. Rodriges, 87.
Atletiko: Oblak, Ermoso, Vitsel, Saviç, Rikelme, Lino (Saul, 81), Koke, De Paul (Morata, 57), Lyorente, Qrizmann, Depay (Aspilikueta, 40).
Rayo Valyekano – Valensiya 0:1
Kanyos, 61.
Qranada – Sevilya 0:3
Pedrosa, 3. Okampos, 32. Ramos, 49.
Barselona – Almeriya 3:2
Rafinya, 33. Roberto, 60; 83 – Baptistao, 41. Qonsales, 71.
“Atletik” – “Las-Palmas”, “Vilyarreal” – “Selta” oyunları gec başa çatıb. “Betis” – “Jirona”, “Kadis” – “Real Sosyedad”, “Alaves” – “Real”, “Malyorka” – “Osasuna” oyunları bu gün keçiriləcək.
1. Jirona 17 14 2 1 41-20 44
2. Real 17 13 3 1 38-11 42
3. Barselona 18 11 5 2 34-21 38
4. Atletiko 17 11 2 4 35-19 35
5. Atletik 17 9 5 3 33-19 32
6. Real Sosyedad 17 8 6 3 29-18 30
7. Betis 17 6 9 2 19-17 27
8. Xetafe 18 6 8 4 24-23 26
9. Las-Palmas 17 7 4 6 15-14 25​
10. Valensiya 18 6 5 7 19-22 23
11. Rayo Valyekano 18 4 8 6 16-24 20
12. Osasuna 17 5 4 8 19-26 19
13. Sevilya 17 3 7 7 23-24 16
14. Alaves 17 4 4 9 14-23 16
15. Vilyarreal 17 4 4 9 23-33 16
16. Malyorka 17 2 9 6 14-20 15
17. Kadis 17 2 8 7 14-24 14
18. Selta 17 2 7 8 16-25 13
19. Qranada 18 1 5 12 20-40 8
20. Almeriya 18 0 5 13 19-42 5
Bombardirlər: Bellingem (Real) - 13, Mayoral (Xetafe) – 12, Qrizmann (Atletiko) - 11.

Faktlar
* “Atletiko” ilə oyunda dubl edən Borxa Mayoral La Liqanın ilk 18 turunda 12 qol vurmaqla “Xetafe”nin klub rekordunu yenilədi. O, İspaniya çempionatının 2009/10 mövsümündə 18 oyundan sonra hesabında 10 top olan Roberto Soldadonu arxada qoydu.
* “Xetafe” ilə oyunda dubl edən Antuann Qrizmann “Atletiko”nun heyətində bütün turnirlərdə vurduğu qol sayını 173-ə çatdırmaqla indiyə qədər Luis Aroqonesə məxsus olan rekordu təkrarladı.
* “Xetafe”nin qapısından 3-cü qolu Serxio Ramos keçirdi. “Sevilya”nın təcrübəli müdafiəçisi artıq La Liqanın 18 fərqli mövsümündə ən azı 1 qol vurub. 37 yaşlı futbolçu bu göstəricidə Xoakinə (“Betis”, “Malaqa” və “Valensiya”nın sabiq oyunçusu) çatmaqla 21-ci əsrin rekordunu təktrarladı. Karyerasına məhz “Sevilya”da başlayan Ramosun uzun müddət “Real”ın şərəfini qoruduğunu da xatırladaq.

Reaksiya
Dieqo Simeone, “Atletiko”nun baş məşqçisi: “3 günlük fasilə ilə ardıcıl dördüncü oyunumuzu keçirdik. Oyunun əksər bölümünü azlıqda keçirdik. Bu üzdən futbolçular maksimum güc sərf etdilər. Bu oyunun bizim üçün ağır, çətin keçəcəyini bilirdik. Heyətlər bərabər olanda oyunun axarına yetərincə yaxşə nəzarət edirdik. Sonradan vəziyyətimiz çətinləşdi, hərçənd yenə də üstünlüyümüz var idi. Üstəlik Markos Lyorenteni də əvəzləməyə məcbur olduq. Bu oyunda Memfis Depaya ümid edirdik, o da oyunun gedişində “artırırdı”. Ancaq hakimin Saviçi qovmaq qərarından sonra bütün planlarımız dəyişdi. Belədə 5-3-1 (Depayı 40-cı dəqiqədə Aspilikueta əvəzlədi – red.) sxeminə keçməli olduq. Bununla belə, bütün vaxt ərzində hesabda irəlidəydik. Ancaq sonda rəqib təzyiqi gücləndirdi, qol vəziyyətləri yaratmağa başladı, asmalardan istifadə etdi – onların ucaboy oyunçuları var. Və yəqin ki, heç-heçəni haqq etdi”.