Misli premyer-liqasında turlar bir-birini əvəzlədikcə ənənəvi mənzərənin dönüşünü müşahidə edirik.
“Qarabağ”ın böyükhesablı qələbələri sıralayır, izləyiciləri ilə xal fərqini artırır. Və bu hələ iki turnirdə mübarizə aparan “Qarabağ”dı.
Diqqətçəkən məqamlar da çoxdu. “Qəbələ”nin acınacaqlı durumu fonunda “Zirə”nin ikinciliyi, “Kəpəz”in sonuncu pillədən qurtulması, “Araz-Naxçıvan”ın enişindən tutmuş “Səbail”in qara bəxtinə qədər... Hələ “Qarabağ”ın “Sumqayıt”ı “çarmıxa çəkməsini” demirik. “Köhlən atlar” Samir Abasovun komandasını elə darmadağın etdi ki, bunu tezliklə unutmaq mümkün olmayacaq. Hərçənd sumqayıtlılar ardıcıl uğurlara görə ötən cüməyə qədər çox məmnun görünürdü. Necə deyərlər, özü yıxılan ağlamaz!
“Gənclər şəhəri”nin təmsilçisi “Qəbələ”yə baxıb özünə təsəllisi verə bilər. “Kəpəz” “qırmızı-qaralar”ı səfərdə 3 cavabsız qolla darmadağın edərək sonuncu pilləyə yuvarladı. “Zirə”nin “Araz-Naxçıvan”ı qəbul etdiyi matçda isə həyəcan çatışmazlığıylıa qarşılaşdıq. Ev sahibləri öyrəşdiyindən, qonaqlar çəkindiyindən çox irəli getmirdi. Çünki Azər Bağırov “qartallar”ın əks-hücumlara önəm verdiyini və bu yolla çox xal qazandığını yaxşı bilir. Yenə də nəticə hər iki tərəf üçün sərfəli oldu. Bu oyunda qolsuz “sülh”dən heç kim narazılıq etmədisə, “Səbail”in Masazır səfərində xeyli narazılıq oldu. Yox, Şahin Diniyev komandadan deyil, bəxtsizlikdən gileyləndi. Dərinə getsək, haqlıdı da. Baş məşqçinin aparıcı oyunçuları növbə ilə sıradan çıxır. Bu dəfə də David Qomis meydanı xərəkdə tərk etdi. Bədbəxt hadisəyə 4 cavabsız qolla məğlubiyyəti də əlavə etsək, “dənizçilər”in yavaş-yavaş təhlükəli sulara baş vurduğunu görə bilərik. Şahin Diniyev buz dağı ilə toqquşmamaq üçün “götür-qoy”a başlamalıdı. Amma görünür Ayxan Abbasov bunu daha tez etməlidi. Çünki “bozqurdlar” 5 oyundu qələbə qazana bilmir. Onlar bu dəfə də “Neftçi”nin meydanından məğlub ayrıldı. Razıyıq, “ağ-qaralar” asan qələbə qazanmadı, amma reallıq tovuzluların sürətlə autsayder mövqeyinə düşdüyünü göstərir. Məqsəd elitada qalmaqdı, lakin bunu bacarmağın yolu məğlubiyyətləri sıralamaq deyil...
Misli premyer-liqası
2-ci dövrə, 16-cı tur
8 dekabr
Sumqayıt – Qarabağ 1:6
9 dekabr
Qəbələ - Kəpəz 0:3
Zirə - Araz-Naxçıvan 0:0
10 dekabr
Sabah – Səbail 4:0
Neftçi – Turan Tovuz 3:2
1. Qarabağ 16 11 2 3 42-14 35
2. Zirə 16 8 5 3 13-8 29
3. Neftçi 16 7 4 5 19-15 25
4. Sumqayıt 16 6 5 5 17-22 23
5. Səbail 16 6 5 5 23-26 23
6. Araz-Naxçıvan 16 6 5 5 17-16 23
7. Sabah 16 6 4 6 25-19 22
8. Turan Tovuz 16 4 4 8 25-27 16
9. Kəpəz 16 3 4 9 10-26 13
10. Qəbələ 16 3 2 11 11-29 11
Bombardirlər: Olavio Juninyo (Qarabağ) – 12, Aleksandr Ramalinqom (Səbail), Leandro Andrade (Qarabağ), Otto Con (Turan Tovuz) – 6.
Növbəti turun oyunları
14 dekabr, 15.30. Kəpəz – Sumqayıt
15 dekabr, 15.00. Araz-Naxçıvan – Sabah
15 dekabr, 17.00. Səbail – Qəbələ
16 dekabr, 18.00. Turan Tovuz – Zirə
18 dekabr, 20.00. Qarabağ – Neftçi
KƏNAN BAHADIR