"Məncə, 1 xal qazanmağa layiq idik" - Yeton Bekiri

"Qəbələ" Misli premyer-liqasında 10-cu turunda "Qarabağ" ilə heç-heçə etdi - 0:0.

"Football-plus.az" xəbər verir ki, "qırmızı-qaralar"ın baş məşqçisi Yeton Bekiri oyunsonrası mətbuat konfransında jurnalistlərin suallarını cavablandırdı.

- Komandamdan razıyam. Müdafiədə yaxşı çıxış etdik. Qol vurmaq üçün də şanslarımız oldu. Ölkənin ən yaxşı komandalarından birinə qarşı oynadıq. Məncə, 1 xal qazanmağa layiq idik.

- Komandanın hədəfi premyer-liqada qalmaqdı, yoxsa daha yüksək pillələr uğrunda mübarizə aparmaq olar?
- Oyundan-oyuna, məşqdən-məşqə daha yaxşı çalışmalıyıq. Futbolçularım bunu edirlər. Mövsümün sonu üçün hansısa proqnoz deyə bilmərəm. Hər matçda hər birimiz maksimumu etməyə çalışmalıyıq. "Qəbələ"yə çempionatın gedişində gəldik. Oyunçuların bizim nə istədiyimizi başa düşməsi üçün müəyyən zaman lazımdı.

- Yerli futbolçuların potensialı sizi qane edir?
- Futbolçuları yerli və ya əcnəbi olmasına görə dəyərləndirmirəm. Hamısı bir komanda kimi məşq edir. kim daha yaxşıdısa, o da start heyətində yer alır. bu gün ilk "11-lik"də 5 azərbaycanlı futbolçu var idi. Onlardan razıyam. Razı olduğum üçün də start heyətində oynayırlar.

- Ölkənin ən güclü komandalarından "Sabah"a 0:4 hesabı ilə uduzduz, "Qarabağ"la isə heç-heçə etdiz. Bu iki oyun arasındakı vaxtda nələri dəyişdiz?
- Birinci psixoloji dəyişikliklər etdik. İkincisi də komandanın oyun üslubunu dəyişdik. Futbolçuların oyun stilimizə uyğunlaşması üçün zaman lazımdı. "Sabah"a məğlub olduğumuz matçda da qol imkanlarımız olmuşdu. Bu gün də oldu. "Sabah" və "Qarabağ" Azərbaycanın ən yüksək səviyyəli komandalarından biridi. Az sayda komandalar onlardan xal ala bilir. Biz öz işimizi görürük.