''Napoli'' və Şimali Makedoniya yığmasının üzvü Elif Elmasın yeni klubunun adına aydınlıq gəlib.

"Football-plus.az" xəbər verir ki, 24 yaşlı yarımmüdafiəçi karyerasını bundesliqa təmsilçisi ''Leyptsiq''də davam etdirəcək. Dünən tibbi müayinədən uğurla keçən istedadlı oyunçu yeni klubu ilə 2028-ci ilə qədər müqavilə imzalayıb. Bu keçid ''öküzlər''ə 25 milyon avroya başa gəlib. ''Leyptsiq'' yanvarın 2-7-si İspaniyada toplanış keçəcək və Elmas da yeni klubuna həmin vaxt qoşulacaq. Göründüyü kimi Almaniya klubu Emil Forsberqin yerini Elif Elmasla doldurdu. 2015-dən ''Leyptsiq''in şərəfini qoruyan 32 yaşlı Forsberqin bu günlərdə ABŞ təmsilçisi ''Nyu York Red Bulls'' ilə müqavilə imzaladığı məlum olmuşdu. Elifə gəlincə, o, ''Rabotniçki''nin yetirməsidi və 2017-ci ildə cəmi 180 min avroya ''Fənərbaxça''ya transfer olunmuşdu. 2 ildən sonra İstanbul nəhəngi onu 16,2 milyon avroya ''Napoli''yə satdı. Elif ''Fənər''də cəmi 47 oyuna çıxaraq 4 qol, 1 məhsuldar ötürmə ilə fərqləndi. Onun Neapol karyerası isə 189 oyun, 19 qol, 11 məhsuldar ötürmə göstəriciləri ilə yadda qaldı. Elmas ''Napoli''nin çempion olduğu ötən mövsümdə A seriyasında 38 oyunun 36-da meydanda olmuşdu. Bu mövsüm isə zədələrdən əziyyət çəkən yarımmüdafiəçi çempionatda 17 oyunun yalnız 9-da iştirak edib. Şimali Makedoniya yığmasında o, 52 oyun keçirib və 12 qol vurub. Yeri gəlmişkən, bu transferdən ''Fənər'' də pay qazanacaq. ''Napoli'' 25 milyon avronun 1,5 milyon avrosunu İstanbul nəhənginə verəcək.

ƏLİ